Кітапханада ақтөбелік жас жазушы Әлихан Жақсылықтың "Африкадан Аляскаға" атты жаңа кітабының таныстырылымы өтті.
16 September 2024
Кітапханада ақтөбелік жас жазушы Әлихан Жақсылықтың "Африкадан Аляскаға" атты жаңа кітабының таныстырылымы өтті.
Жас жазушының бұдан бұрын 2019 жылы «Алты құрлық» кітабы, 2021 жылы «Төрт мұхит» хикаяттар жинағы, осы жылдың басында «Нотр-Дамда құлшылық жасау керек пе?» романы жарық көрген еді. 25 жасында Жазушылар одағына мүше болып, 26 жасында «Ерен еңбегі үшін» медалін алған қаламгердің шығармалары ағылшын тіліне аударылып, шетелдік оқырмандарға да жол тартуда.
"Африкадан Аляскаға" атты жаңа кітабында Автор адамзаттың өткені мен бүгінін баяндай отырып, ең ірі қылмыстарды, соғыстарды, геноциттерді әшкерелейді. Асқақ деп түсініп жүрген ұғымдарымызды кейіпкерлердің дүниетанымы мен көзғарасы арқылы қайта қарауға ой салады. Романда адам нәсілінің іші ғана емес түр әлпеті де өзгеріске ұшырауы қалыпты жағдайға айналып, адамзат барар бағытынан жаңылуы мүмкін екені баяндалады. Сан ғасырға созылған езгі мен құлдықты, соғыс пен аштықты жасаған тылсым күш емес адамның өзі екенін айтады.
Шараны белгілі ақын Бауыржан Бабажанұлы жүргізді. Шарада сөз алған әдебиетші-сыншы Амангелді Кеңшілік жас та болса, әдебиетте өзіндік орын алып үлгерген жас автордың талпынысы мен талабына сәттілік тілеп, өз пікірін білдірді.
Кітаптың таныстырылымына зиялы қауым өкілдері, ақын-жазушылар, БАҚ өкілдері, оқырмандар қатысты.
