Бүгін кітапханаға IFLA Бас хатшысының орынбасары Хелен Мандл бастаған ұлттық қауымдастық мүшелері арнайы келіп, ұжыммен кездесті.
27 August 2024
«Бұл жолғы кездесу 2025 жылғы IFLA(WLIC) Дүниежүзілік кітапхана және ақпарат конгресін өткізу алдындағы алғашқы іскерлік қадам» - деді қауымдастық мүшелері.
Естеріңізге салсақ, IFLA кітапхана ісінің озық және инновациялық идеяларын шоғырландыратын IFLA (WLIC) Дүниежүзілік кітапхана және ақпарат конгресі келер жылы Қазақстанда өтеді деп жоспарлануда. Кітапханашылардың кәсіби қарым-қатынасын арттыратын, әлемнің 100-ден астам елінен үш-төрт мыңға дейін қатысушылар келетін беделді Конгресті елімізде өткізуге «Қазақстан Республикасы Жоғары оқу орындарының кітапханалар қауымдастығы» мен «Қазақ Туризм» Ұлттық Компаниясы ұсыным берген еді.
Ұлттық қауымдастық мүшелері бұл жолы кітапхананың тыныс-тіршілігімен, мүмкіндіктерімен танысып, кәсіби қарым-қатынасты нығайту үшін жан-жақты пікір алмасты. Дүниежүзілік ауқымды шараны ұйымдастырудың тиімді тұстарын, кітапхана тарапынан жасалатын негізгі жұмыстар мен кезек күттірмейтін мәселелер жайын сөз еткен ұжым басшысы Ғазиза Құдайбергенқызы кітапхананың ауқымды шараға жан-жақты қолдау көрсетуге дайын екендігін жеткізді.
Кездесу аясында алдағы жоспарлар нақтыланып, кәсіби байланыстар талқыланды.
