Темірбек Жүргенов – қазақ руханиятының жарық жұлдызы

Қазақстан Республикасы Ұлттық академиялық кітапханасында көрнекті қоғам және мемлекет қайраткері Темірбек Жүргеновтің туғанына 125 жыл толуына орай «Темірбек Жүргенов – қазақ руханиятының жарық жұлдызы» атты дөңгелек үстел өтті.

Рухани іс-шараны Жүргенов атындағы қоғамдық қордың төрағасы Сәпен Аңсат ашты.  Мемлекет басшысының тапсырмасымен еліміздің барлық аймағында қазақ мәдениетінің дамуына зор үлес қосқан тұлғаның мерейтойы аталып өтілуде. Сондай-ақ,  ТҮРКСОЙ ұйымының шешімімен Түркі әлемінде 2023 жыл — Жүргенов жылы болып жарияланып еді. 

Шараның  мақсаты – қазақ мәдениетінің дамуына зор үлес қосқан тұлғаның есімін халық жадында жаңғырту, ғибратты ғұмыр жолынан терең танымдық мәліметтер ұсыну.

Рухани шара  Т. Жүргенов туралы танымдық деректі фильмнің көрсетілімінен басталды, оның еңбектері мен шығармашылығына, өмір жолына арналған  кітап көрмесі ұйымдастырылды.

Жиын барысында зиялы қауым өкіл­дері қоғам қайраткерінің өнегелі өмірі мен еңбек жолына кеңінен тоқталып,  мәдениетіміз бен әдебиетіміздегі, өнер­дегі алатын орны туралы пайымды пікір­лерімен бөлісті. Парламент Сенатының депутаты Руслан Рүстемұлы қоғам қай­раткерінің рухани болмысын айшықтап айтып берді.

– Сындарлы кездерде осындай буын өкілінің болуы тоталитарлық жүйе­ден қазақ өнерін сақтап қалатын ерлік еді. Қазір еліміздегі 4 000-ға жуық мектеп пен жоғары оқу орнының ашылуына қоғам қайраткерінің ықпал еткенін көбі біл­мейді. 30 жасқа толмай Ташкенттегі Қазақ педагогикалық институттың басшысы болды, сол кездің өзінде мәдениет, оқу-ағарту ісін қатар алып жүрді, – деді ол.

Президент жанындағы Ұлттық құрыл­тай мүшесі, академик Кәрімбек Арыстан­бекұлы Т.Жүргенов шығармашылығын­дағы ерекшеліктерге тоқталды.

Өткен ғасырдың отызыншы жылдары «Темір-Нарком» атанған Темірбек Жүр­генов­тің есімі тек қазаққа ғана емес, түгел түркі жұртына мәлім.