Бүгін ҚР Мәдениет және ақпарат министрлігінің кеңейтілген алқа отырысы өтті. Онда еліміздегі мәдениет пен ақпарат және қоғамдық даму саласының 2023 жылғы жұмысының қорытындысы мен осы жылға арналған негізгі міндеттер айқындалды.
15 February 2024
Бүгін ҚР Мәдениет және ақпарат министрлігінің кеңейтілген алқа отырысы өтті. Онда еліміздегі мәдениет пен ақпарат және қоғамдық даму саласының 2023 жылғы жұмысының қорытындысы мен осы жылға арналған негізгі міндеттер айқындалды.
Отырысқа ҚР Президент әкімшілігінің өкілдері, Қазақстан Халқы Ассамблеясы хатшылығының меңгерушісі, ҚР Парламент депутаттары, зиялы қауым өкілдері, ҚХА, ҮЕҰ, жастар ұйымдары, БАҚ өкілдері қатысты. Бейнеконференция арқылы алқаны орталық және Мемлекеттік жергілікті атқарушы органдар да тыңдады.
ҚР Мәдениет және ақпарат министрі Аида Балаева өткен жылдың негізгі қорытындылары туралы баяндама жасады.
"Мәдениет пен руханиятта шекара жоқ екені анық. Бірақ заман талабына, қоғам талабына сай келетін кейбір мәселелердің нақты заңдық шешімі болуы керек» - деген министр отандық әдебиетті қолдау мәселесіне де кеңірек тоқталды.
«Сөз жоқ, кітап дүкендері қазақ тілді әдебиеттермен толығуға тиіс. Енді кітаптарды басып шығару, әдебиетті қолдау қалың көпшілікпен талқыланып, жаңа ережеге сәйкес жүзеге асады. Бұл ретте ұлт интеллегенциясына жүктелетін міндеттің салмағы ауыр. Зиялы қауым білім, ғылымға құштарлық, еңбек адамын қадірлеу, адал азаматтарды ардақ тұту сияқты адалдық ізгі қасиеттерді қалың оқырман санасына сіңіріп, ұлттың рухани кемелденуі үшін аянбай еңбектенеді деп сенемін. Осыған орай Министрлік жанына әдеби клуб құруды жоспарлап отырмыз. Ондағы мақсат- әдебиеттің өзекті мәселелерін ортаға салып, жаңа тенденцияларды талқылау және жаңа туындылар мен авторларды насихаттау, қоғамды кітап оқуға үндеу» - деді Аида Ғалымқызы.
Сондай-ақ, Министр кітапхана саласындағы жаһандық цифрландыру процесін де тілге тиек етті. Алдағы уақытта барлық ведомство мен жүйелердің кітапханаларына Қазақстандық ұлттық электрондық кітапхана кезең-кезеңімен енгізіледі. Биылғы бірінші тоқсанда пилоттық жобаға қосылатын екі облыстық кітапхана анықталды.
Шараға жиналғандарға ҚР Ұлттық академиялық кітапханасы 2022-2023 жылдары Мемлекеттік тапсырыспен шығарылған кітаптар көрмесін ұсынды. Жиын барысында қатысушылар өз ой-пікірлерімен бөлісті.
