Өткен аптада жас жазушы Әлихан Жақсылықтың "Нотр-Дамда құлшылық жасау керек пе?" атты кітабының таныстырылымы өтті.

Жаңа туынды психологиялық жанрда жазылуымен ерекшеленеді.

25 жасында Жазушылар одағына мүше болып, 26-сында «Ерен еңбегі үшін» медалін алған қаламгердің бұл – үшінші кітабы. Бұған дейін жас жазушының 2019 жылы «Алты құрлық» кітабы, 2021 жылы «Төрт мұхит» хикаяттар жинағы жарық көрген.

Кітап қазіргі қоғамдағы жастардың, жасөспірімдердің ішкі ойларын білуге, оларды түсінуге арналған. Бұл шығарманы оқыған адам барынша айналасындағы адамның ішкі әлеміне үңілуге талпыныс жасайды.  

Кітаптың шыққанына көп болмаса да еліміздің бірнеше өңірінде таныстырылы өтіп, оқырман қауымнан жақсы бағасын да алып үлгерген.  Кешті ақын Бауыржан Бабажанұлы жүргізді.

«Кітаптың таныстырылымы Алматы, Қонаев, Талдықорған, Ақтөбе қалаларында өтті. Енді, міне, Астанаға келдік. Кей жерлерде менің 60-70 жылдығым секілді шапан жауып, картинамды салып сыйлап жатты. Кітап туралы әртүрлі пікірлер айтылып жатыр. Бірақ сын жоқ. Ал келесі кітаптарда бүгінгі қателігімді қайталамау үшін сын маған ауадай керек. Қазір "Африкадан Аляскаға дейін" деген роман жазып жатырмын. Осы күзге дейін аяқтап, сол кітаптың таныстырылымын жасауға алдарыңыз тағы келемін деп ойлаймын. 30 жасыма дейін 10 роман жазамын деп бекініп отырмын» - дейді жас жазушы.

Алдағы уақытта Әлихан Жақсылықтың бұл романы шетелдіктерге жол тартпақ. Ағылшын тіліне аударылып та үлгерген. Оның таныстырылымы Лондон қаласында өтеді деп жоспарлануда.

Әдеби жиынға зиялы қауым өкілдері, елордалық ақын – жазушылар, әдеби сыншылар, кітапханашылар мен оқырмандар қатысты.