ҚР Ұлттық академиялық кітапханасында белгілі фототілші Сайлау Пернебаевтың 85 жылдығына арналған «Ақ пен қара» атты фотокітабының тұсаукесері және мерейтойлық жеке шығармашылық фотокөрмесінің ашылуы өтті.
03 October 2023
Бүгін ҚР Ұлттық академиялық кітапханасында Қазақстан Жазушылар одағы, «Фотоөнер» қоғамдық бірлестігінің және С.Пернебаевтың отбасының ұйымдастыруымен қазақстандық фотожурналистиканың негізін қалаушылардың бірі, белгілі фототілші Сайлау Пернебаевтың 85 жылдығына арналған «Ақ пен қара» атты фотокітабының тұсаукесері және мерейтойлық жеке шығармашылық фотокөрмесінің ашылуы өтті.
Шараның модераторы – Қазақстан Жазушылар одағы басқармасы төрағасының бірінші орынбасары Нұржан Қуантайұлы.
Қазақ фотожурналистикасының қалыптасуы мен дамуына айрықша үлес қосқан, ұлттың қайталанбас тұлғаларының бейнелерін тарихқа шежіре қып қалдырған Сайлау Пернебаев ғибратты ғұмырының 40 жылдан астам уақытын осы салаға арнаған. Өмірде «Тосыннан түсіргенде» деген атпен ел есінде қалған фототілшінің олжа салмаған жанры кемде - кем еді.
«Ақ пен қара» атты кітапқа Сайлау Пернебаевтың ел шежіресін фотоөнермен өрнектеген үздік туындылары жарияланған. Кітап көпшілік оқырманға арналған.
«Фотоөнер» қоғамдық бірлестігінің қолдауымен, таралымы 1000 данамен «Атамұра» баспасынан жарық көрген жинақтың құрастырушылары – Асылхан Әбдірайымұлы, Айнұр Сайлауқызы.
Кітаптағы суреттер Сайлау Пернебаевтың отбасылық мұрағатынан алынған.
Шара аясында өткен фотокөрмеге автордың жарты ғасыр бойы түсірген еңбектерінен жалпы саны 60 фото іріктеліп қойылды.
Фотокітаптың құрастырушы авторы, Сайлау Пернебаевтың шәкірті Асылхан Әбдірайымұлы «Сайлау Пернебаев – 85» тақырыбында баяндама жасап, ұстазының кісілік келбетін, ізгілікті ізін тіліне тиек етті.
ҚР Парламент сенатының депутаты – Нұртөре Жүсіп, ҚР Парламенті Мәжілісінің – Жанарбек Әшімжан, ҚР Президент кеңесшісі – Бауыржан Омаров, Қазақстанның мемлекет қайраткері, дипломат – Қайрат Сарыбай тағы басқа зиялы қауым өкілдері фототілші жайлы естеліктерімен бөлісіп, шығармашылық жолына тоқталды.
С.Пернебековтың шығармашылық кешіне зиялы қауым өкілдері, жазушылар, фотографтар, БАҚ өкілдері, студенттер қатысты.
