Бүгін Елордада өтіп жатқан «Eurasian Book Fair-2023» Еуразиялық халықаралық кітап жәрмеңкесінің төртінші күні. ТМД, Еуропа, Азия елдерінің баспа ісін, кітап саудасын бір алаңға біріктіруді мақсат еткен шараның оқырманға берері көп.
23 April 2023
Бүгін Елордада өтіп жатқан «Eurasian Book Fair-2023» Еуразиялық халықаралық кітап жәрмеңкесінің төртінші күні. ТМД, Еуропа, Азия елдерінің баспа ісін, кітап саудасын бір алаңға біріктіруді мақсат еткен шараның оқырманға берері көп.
Бес күнге жоспарланған көрме аясында ҚР Ұлттық академиялық кітапханасы біршама мәдени, маңызды кездесулер мен әдеби кітаптардың тұсаукесерлерін ұйымдастырды.
Сенбілік шара ақын-аудармашы, саясаттанушы Елден Сарыбайдың «Искусственный Интелект и креативное мышление» атты панельдік пікірталасымен басталды. Жасанды интеллект және оның маңызы мен мүмкіндігі жайында автор кеңінен мағлұмат берді.
Одан соң «Алқа» әдеби-мәдени клубының отырысы өтті. «Шығыс даналығы» кітабы жан-жақты талданып, талқыланды. Филолог, аудармашы, журналист азаматтар - Сәкен Нұрқабекұлы мен Айбек Нәби оқырманға ғибратты ой ұсынып, шығыс даналығының өміршеңдігі жайлы әңгіме өрбітті.
Сенбінің кешінде нәзік лириканың иесі, талантты ақын, Қазақстан Жазушылар одағының мүшесі Құралай Омар өз оқырмандарымен кездесті. «Мен өмірді бояуды үйрендім» деп аталған шарада жиналғандар ақынның өлеңдерін тыңдап, көкейлеріндегі сауалдарын жолдады.
Ұлттық кітапхананың ұйымдастырған әдеби, мәдени жобалары жексенбі күні де өз жалғасын таппақ.
