![](/sites/default/files/styles/news_medium/public/2022-09/FB_IMG_1664195093760.jpg?itok=__Q8FCIo)
Ұлттық академиялық кітапханада «Kitaptime – 2022» жалпы республикалық кітап фестивалі өтті
26 September 2022
Мәдениет және спорт министрлігінің қолдауымен өткен фестиваль 10.00-ден 18.00-ге дейін жалғасты.
«Бұл фестивальдің басты мақсаты – жазушыларымызды, ақындарымызды жастарға жақындату, кітапқа деген қызығушылықты арттыру. Бұл тек бастама деп ойлаймын», - деді Мәдениет және спорт министрі Дәурен Абаев құттықтау сөзінде.
Іс-шараның ең басты ерекшелігі – еліміздің көпшілік кітапханаларында «Kitaptime – 2022» жалпы республикалық кітап фестивалі бір уақытта басталып, көпшіліктің көзайымына айналды.
Фестиваль аясында кітап көрмесі мен жәрмеңкесі, «ПоэзияParty», «Non-Fiction», «KazakhComics»,«АвтографTime», «Блогерлік шеберлік», «Қолөнер құпиясы», буккросинг, бас редакторлармен кездесу сияқты көптеген мәдени іс-шаралар өтті. Маралтай Райымбекұлы, Роза Мұқанова, Алтыншаш Жағанова, Елена Әбдіхалықова, Айгүл Ісмақова, Танакөз Толқынқызы, Дәулеткерей Кәпұлы, Ерлан Жүніс, Мирас Асан, Батырхан Сәрсенхан, Айзада Рахымжанова, Салтанат Қайырбек, Айдын Байыс секілді зиялы қауым өкілдері фестивальге қатысып, қолдау білдірді.
«Кітапқа деген ықылас, ниет қазір дұрысталды. Елдің бәрі кітап оқитын болды. Осыдан бірнеше ай бұрын министрлік қолдауымен Алматыда ашық аспан аясында үш күнге созылған кітап жәрмеңкесі болды. Сол кітап тойы Қазақстанға жайылып, барлық облыс орталықтарында етек алды. Бүгін де жалғасын тауып жатыр», - деді ақын Маралтай Райымбекұлы.
Қандастарымыз «Отандастар» қорымен өткен кездесулерде қазақтың көркем әдеби шығармалары мен тарихи кітаптарының жетіспеушілігін жиі айтады. Осы орайда, қор Ұлттық кітапханамен бірлесе отырып «Әр қазаққа бір кітап» акциясын бастады. Іс-шараның басты мақсаты халқымыздың әдебиеті, тарихы мен мәдениетінен сыр шертетін кітаптарды алыс-жақын шетелдерде тұратын қандастарға табыстау. Ендеше «Кітап қорын жинайық, шетелдегі қандастарға сыйлайық» деген ұранмен баршаңызды кітап жинау акциясына белсене қатысуға шақырамын, - деді «Отандастар» КЕ АҚ президенті Абзал Сапарбекұлы.
Осы акцияны Мәдениет және спорт министрі Дәурен Абаев қолдап, кітап сыйлады.