«Ақ лалагүлдер мекені – Финляндия»

        Алқалық оқырмандар кезекті басқосуда «Ақ лалагүлдер мекені – Финляндия» атты кітапты талдады. Талдау топтық жұмыс форматында 3 кезең бойынша өтті. Алғашқы кезеңде Финляндияның жай-күйі мен кітап мазмұны айтылды. Тараулар бойынша оқырмандар баяндама жасады.

        Екінші кезең «Біздің феномен» деп аталды. Қазақ мәдениетіне әрі мемлекет ретінде қалыптасуға ықпал еткен тұлғалар бойынша оқырмандар өз феноменін айтты. Топтар өндіріс, руханият, қайраткерлік саласында жетістікке жеткен қазақтың феномендерін еске түсіріп, еңбегімен елге жаққан тау тұлғалардың қызметін саралады. Өндіріс бойынша Құрманғали Қосшығұлұлы, руханият бойынша Ахмет Иассауи, Абай, Шәкерім және Мәшһүр Жүсіпті тілге тиек етті. Үшінші кезең «Қазақстан – ... мекені» деп аталды. «Біз қалаймыз, біз жасаймыз» стилінде Қазақстан жайлы өз ойларын айтып, айғақ келтірді. Мәселен, бірінші топ «Қазақстан – киіктер мекені» десе, екінші топ «Қазақстан – қызғалдақтар мекені», – деді. Ал үшінші топ «Қазақстан – қайраткер, қайсар рухты тұлғалар мекені. Халқымыз ғасырлар бойы арыстандай айбатты, жолбарыстай қайратты жастар тәрбиелеуді о бастан көздеген ел. Елдік мақсатта жұмыла білетін жастар тәрбиелеу қазір де өзекті мәселе», – деп кешті түйіндеді.

        Сондай-ақ бұл талқыға «Ақ лалагүлдер мекені – Финляндия» атты кітапты қазақ тіліне ең алғаш тәржімалаған жазушы Әлия Өмірзаққызы да қатысты. Оқырмандармен жүздесіп, өз әсерімен бөліскен автор ең соңында К. Ахметованың туған жер туралы өлеңін оқып берді. Автордың ойда жоқта келуі де оқырмандарға керемет  тосын сый болды.