Негізгі қор – бірыңғай қордың бөлігі, ол отандық және шетелдік басылымдардан, анықтамалық, оқулық және ғылыми әдебиеттерден құралған. 1 қаңтар 2024 ж. жағдайына негізгі қордың көлемі 1 372 195 дананы құрайды. Қордың құрамына кітаптар, мерзімді басылымдар, аудиокітаптар, электрондық басылымдар, карталар, ноталық басылымдар, открыткалар, микрофишалар және зағип, көзі нашар көретін оқырмандарға арналған Брайл кітаптары кіреді. Сонымен қатар, Қазақстанның көрнекті коллекционерлерінің, ғылым, мәдениет және ағарту ісі қайраткерлерінің 30-дан аса құнды жеке еңбектері бар.
Электрондық қор (МЭҚҚ) – «Қазақстандық Ұлттық электрондық кітапхана» (ҚазҰЭК) жобасы ретінде 2007 жылы құрылды. Ол - ҚРҰАК-ның қоры және еліміздің алдыңғы қатардағы кітапханалары мен ғылыми кітапханаларының қорында бар баспа басылымдардың электрондық көшірмелерінің топтамалары. Қор мөлшері 1 қаңтар 2024 ж. жағдайына 72 593 е-көшірмені құрайды. Қор жүйелі түрде толықтырылады және kazneb.kz порталы арқылы қол жетімді. Барлық авторларды және баспаларды Қазақстандық Ұлттық электрондық кітапхана (ҚазЭҰК) құруға атсалысуға шақырамыз. Е-көшірмелер қорына кіруге мүмкіндіктер ҚР-ның авторлық құқықты қорғау туралы қолданыстағы заңнамаларға сәйкес берілген.
Ресми және нормативтік басылымдар қоры - ҚР мемлекеттік, үкімет және басқару органдарының, халықаралық мекемелер басылымдары, ресми нормативті-шаруашылық құжаттар, ҚР статистика агенттігінің ресми мамандандырылған шығармалардың құжаттар қоры болып саналады.
Диссертациялар мен авторефераттар қорын барлық білім саласы бойынша қазақстандық ғалымдардың докторлық және кандидаттық диссертациялары құрайды. Қор әр түрлі білім салалары бойынша 10 000-нан аса диссертация мен авторефераттар атауынан тұрады.
Сирек кітаптар қоры қазақ, орыс және араб тілдеріндегі 13568 басылымды қамтиды. Бағалы кітаптар қорын «Мәдени мұра» мемлекеттік бағдарламасы бойынша шыққан басылымдар құрайды. ҚР ҰАК-ның қорына Қазақстан тарихы, археологиясы, этнографиясы мен мәдениеті бойынша 550 атаудан тұратын кітаптар түсті. Соның ішінде «Бабалар сөзі», Еуропа, Америка, Австралия, Африка, Азия елдерінің озық әдеби шығармалары кіретін «Дүниежүзілік кітапхана әдебиеті» сериялары, «Қазақ әдебиетінің тарихы», «Қазақ халқының көне заманнан қазіргі күнге дейінгі философиялық мұрасы», «Әлемдік мәдени пікір», «Экономикалық классика», «Әлемдік философиялық мұра». Сонымен қатар, бағалы қорға «Еуразияның алтын коллекциясы» атты қазақстандық авторлардың жобасы бойынша 14 шығарма енгізілді.
Шетел әдебиеттері қоры 15000-нан астам көптеген елдер тілдеріндегі басылымдардан құралған: тілдік және салалық сөздіктер, анықтамалықтар, шетел тілін үйренушілерге көмекші құрал оқулықтары; әлем тілдеріндегі ғылым мен техниканың әр түрлі салалары бойынша басылымдар, беллетристика, елтану әдебиеттері бар. Әсіресе, ағылшын тілін үйренушілер үшін тесттік емтихандарға (TOEFL, IELTS және т.б.) дайындалуға мүмкіндік беретін көмекші құрал оқулықтары таптырмас көмек. Шетел тарихы мен ғылымына, мәдениеті мен әдебиетіне қызығушылық танытушыларға кең көлемді материалдар, яғни оқулықтар, CD дискілер, электронды оқулықтар мен басқа мәліметтер қоры ұсынылады.
Өнер бойынша әдебиет қоры музыка, кино, театр, бейнелеу өнері, сурет, графика, мүсін, сәулет өнері, декорация-қолданбалы өнер, ноталар басылымдарынан тұратын 11500 данадан астам баспа құжатынан құралған. Қордың ең құнды болып саналатын басылымдарына «Мәдени мұра» мемлекеттік бағдарламасы аясында шыққан «Қазақ өнерінің тарихы», «Қазақстан ХIХ ғасыр суретшілерінің шығармалары», «Қазақ мәдениеті», «Қазақ өнерінің тарихы», Сергей Калмыковтың, Әбілхан Қастеевтің альбомдары, Қазақстан мәдениеті, еліміздің белгілі композиторлары, суретшілері туралы өнер және музыка басылымдары, «Қазақстан», «Ұлттық Қазақстан» энциклопедиялық сөздіктері жатады. Сондай-ақ, бөлім қоры аудиовизуалды шығармалар және электрондық құжаттар: бейнефильм, аудиокассета, ықшам-диск, CD-DVD дискі түріндегі «Асыл мұра» сериясының «Жаңа Қазақстанның жаңа фильмдері», «Музыкалы Қазақстан», белгілі қазақ композиторлары шығармашылығына арналған «Асанәлі Әшімов», «Ахмет Жұбанов» сияқты шығармаларымен толықтырылған.
Көркем әдебиет қоры Қазақстан жазушыларының көркем шығармалары мен шетел әдебиетi классиктерінің, қазақ және орыс тiлiдеріндегі қазіргі заманғы әдебиет пен балалар әдебиетінің топтамасынан тұрады. Қордың негізін қазақ жазушыларының үздік шығармалары енген «Атамұра кітапханасы», «Отырар кітапханасы» сияқты сериялардан құралған топтама құрайды.
Анықтамалық-библиографиялық қор (АБҚ) қазақ және орыс тілдеріндегі энциклопедиялар мен энциклопедиялық сөздіктерден (әмбебап және салалық), анықтамалықтар мен сөздіктерден (түсіндірме, терминологиялық, орфографиялық және т.б.), библиографиялық көрсеткіштер мен мемлекеттік библиография басылымдардан (кітап, журнал, газет жылнамалары), мемлекеттік мультимедиялық басылымдардан (CD-ROM) құралған.
Кітапхана ісі басылымдары қорында (КІБҚ) кітапханатану, библиографиятану, кітаптану жинақтары топтастырылған. Олар – қазақ, орыс, ағылшын тілдеріндегі кітаптар. Негізгі қорды кәсіптік мерзімді басылымдар, әдістемелік материалдар, конференция, мәжіліс материалдары, Қазақстан кітапханаларының басылымдары, анықтамалар, нормативтік материалдар, энциклопедиялар, терминдік сөздіктер, мақалалар жинағы, библиографиялық көрсеткіштер және т.б. құжаттар құрайды.
Тұрсұнбек Какишев Зал “Ғалым” 4 қабат, 416 кабинет
Қазақстан Республикасының еңбек сіңірген ғылым қайраткері, Қазақстан Жазушылар одағының С. Сейфуллин атындағы сыйлығының иегері, Халықаралық жоғары мектеп ғылым академиясының құрметті академигі, Халықаралық Ш. Айтматов академиясының академигі, филология ғылымдарының докторы, профессор Тұрсынбек Кәкішұлы Кәкішевтің (1927-2015) туыстары жеке кітапханасынан кітаптар жинағын 2016 жылы Қазақстан Республикасы Ұлттық академиялық кітапханасының қорына берді (4079 дана). Жеке жинақта араб және қазақ тілдерінде латын әліпбиінде жарық көрген сирек басылымдар, гуманитарлық және жаратылыстану ғылымдары бойынша кітаптар, қазақтың көрнекті жазушылары Сәкен Сейфуллин мен Сәбит Мұқановтың өмірі мен шығармашылығы туралы кітаптар мен мұрағат материалдары ерекше орын алады, сондай-ақ қолжазбалар мен басқа да материалдар кіреді (77 папка).
«Рухани жаңғыру» залы 4 этаж, кабинет 423
Қазақстанның еңбек сіңірген қайраткері, ҚР Дипломатиялық қызметінің еңбек сіңірген қызметкері, Қазақстанның еңбек сіңірген журналисі, саясаттанушы, саяси ғылымдарының докторы, профессор, ҚР Академиясының академигі Қуаныш Сұлтанұлы Сұлтановтың (1945) жеке кітапханасынан кітаптар жинағы 2017 жылы Қазақстан Республикасы Ұлттық академиялық кітапханасының қорына берілген (2399 дана). Жинаққа саясаттану, экономика, тарих, көркем әдебиет бойынша кітаптар және де Қуаныш Сұлтановтың шығармалары енгізілген.
Дүкенбай Досжан залы «Жазушы» 4 қабат, 403 кабинет
Жазушы, Қазақстан Республикасы Мемлекеттік сыйлығының және М.Әуезов атындағы Ұлттық сыйлықтың лауреаты Дүкенбай Досжанның (1960-2010) жеке кітапханасынан кітаптар жинағы Қазақстан Республикасы Ұлттық академиялық кітапханасының қорына 2016 жылы тапсырылды (863 дана). Жинақ иесінің кәсіби қызығушылықтары мен қалауы бойынша кітап қоры реттік жүйе бойынша қойылды. Қорға Дүкенбай Досжанның шығармалары, әдебиеттану, тарих, философияға арналған әдебиеттер, энциклопедиялық басылымдар, сөздіктер және т.б. кіреді.
Әкім Тарази залы 4 қабат, 419 кабинет
Жазушы, Қазақстан Республикасы Мемлекеттік сыйлығының лауреаты, Қазақстанның еңбек сіңірген қайраткері Әкім Таразидың (1933) жеке кітапханасынан кітаптар жинағы 2016 жылы Қазақстан Республикасы Ұлттық академиялық кітапханасының қорына тапсырылды (1048 дана). Жинағына Әкім Таразидің шығармалары, қазақ-шетел ақын, жазушыларының еңбектері, қоғам және саяси қайраткерлердің шығармалары, Қазақстан тарихы мен мәдениетіне қатысты кітаптар кіреді.
Қажығали Мұханбетқалиұлы залы 4 қабат, 415 кабинет
Жазушы, ҚР Мемлекеттік сыйлығының лауреаты Қажығали Мұханбетқалиұлының (1942-2020) жеке кітапханасынан кітаптар жинағын жазушының туыстары 2016 жылы Қазақстан Республикасы Ұлттық академиялық кітапханасының қорына тапсырды (412 дана). Жинаққа жазушының шығармалары, қазақ ақын-жазушыларының еңбектері, қоғам және саяси қайраткерлердің шығармалары, Қазақстан тарихы мен мәдениетіне қатысты кітаптар кіреді.
Хамит Ерғали қоры 4 қабат, 420 кабинет
Қазақ ақыны, аудармашы, Қазақ КСР Халық жазушысы Хамит Ерғалиевтің (1916-1997) жеке кітапханасынан кітаптар жинағы 2018 жылы ақынның туыстары Қазақстан Республикасы Ұлттық академиялық кітапханасының қорына (1470 дана) тапсырды. Жинаққа автордың қаламынан туған мол мұрасы, жазушының замандастарының кітаптары, шетелдік көркем әдебиеттер, сирек кітаптар, журналдар кіреді.
Шөмішбай Сариев қоры 4 қабат, 404 кабинет
Ақын, аудармашы, Қазақстанның еңбек сіңірген қайраткері, филология ғылымдарының кандидаты, Франц Кафка атындағы халықаралық сыйлықтың және «Платинды Тарлан» сыйлығының лауреаты, «Парасат ордені»нің иегері, «Жыл адамы – Алтын Адам» ұлттық сыйлығының иегері Шөмішбай Нағашбайұлы Сариевтің (1946-2021) жеке жинағы 2021 жылы ақынның туыстары кітапханаға сыйға тартты (518 дана). Жинаққа автордың қаламынан туған мол мұрасы, көркем әдебиеттер, мәдениет пен өнердің сан алуан салалары бойынша кітаптар, энциклопедиялық басылымдар, сөздіктер, т.б. кіреді..