ҚР Ұлттық академиялық кітапханасында  Қазақстан Республикасының еңбек сіңірген қайраткері, медиаменеджер, психология ғылымдарының кандидаты – Арман Давлетяровтың кітаптарының тұсаукесері өтті.

«Айман Ана», «Мама Айман», «Қалам ұшындағы ой», «Мәскеулік Шыңғысханның хикаясы» кітаптарының қазақ тілінде жарық көруі автордың тарихи отанындағы басты жаңалығы. Мерекелік шара театрландырылған қойылыммен,  «Айман Ана» кітабының тұсаукесерімен ашылды.

«Ана тақырыбы - біз үшін шетсіз де шексіз ұғым. «Айман Ана» кітабымда анам Айманның өмір жолы, ғибратты ғұмыры  жан-жақты ашылады. Бұл кітап тек анамның өмір жолын сипаттайтын әңгіме ғана емес, өз тамырым, мәдениетім мен ана тіліме деген сүйіспеншілік пен адалдықтан туған ода» - деді кітап авторы.

Айман ана оқырманға табандылық пен даналықтың нышаны, сүйіспеншілік пен адалдық арқылы өмірдің барлық сынақтарын жеңіп, жан дүниесінде бақытты сақтай білген жанның үлгісін көрсетеді.

Шараға шоу-бизнес өкілдері, БАҚ өкілдері, кітап құрастырушылар, баспа өкілдері және басқа да мәртебелі қонақтар, оқырмандар қатысты.