Ақын, ғұлама ойшыл, ағартушы Шәкәрім Құдайбердіұлының 165 жылдығына орай «Шәкәрім оқулары» республикалық байқауының қорытынды финалы өтті

Кітапханамызда 27 наурыз күні «Шәкәрім оқулары» байқауының қорытынды финалы өтті. Байқаудың негізгі мақсаты – Шәкәрім Құдайбердіұлының рухани мұраларын насихаттау, туған тілге, көркем әдебиетке, оның ішінде поэзияға деген жас ұрпақтың құштарлығын арттыру, шығармашылық қабілеттерін ұштап, жетілдіру. Үш кезеңнен тұрған байқауға республикамыз бойынша 2000-нан аса 5-7 сынып оқушылары қатысты. Бірінші кезең 1 ақпан мен 3 наурыз аралығында ауыл, аудан, облыс орталықтарында өтіп, әр өңірден бір жолдамадан алған жүлдегерлер 6 наурызда ҚР Ұлттық академиялық кітапхана онлайн ұйымдастырған жартылай финалдан өтті. Үшінші кезең – ақтық финал Елордада өтіп, 11 үміткер тартысқа түсті.

Ақтық байқауға 11 оқушымен бірге оларды дайындаған ұстаздар, кітапханашылар және ата-аналар қатысты.

Ақтық финалға қазылық еткен әділқазылар алқасы

1. «Шәкәрім оқулары» республикалық байқауының өтуіне қолдау білдіріп, демеушілік көрсеткен кәсіпкер, «Адал ас» корпорациясының президенті Ермек Асылғазинұлы Мезібаев;

2. Тарих ғылымдарының докторы,  Л.Н. Гумилев атындағы Еуразия ұлттық университетінің профессоры, ҚР ҒЖБМ ҒҚ Мемлекеттік тарих институтының Тарих және қоғамдық ғылымдар Академиясының академигі – Алпысбес Махсат Алпысбесұлы;

3. Әдебиеттанушы, филология ғылымдарының кандидаты, «Абай академиясы» ғылыми-зерттеу институтының директоры – Жандос Мағазбекұлы Әубәкір;

4. Ақын – Ықылас Ожай;

5.ҚР Ұлттық академиялық кітапхана директоры – Ғазиза Құдайбергенқызы Нұрғалиева;

6.  Халықаралық «Абай» қорының басшысы – Аслан Ғафуров.

Байқаудың тәртібі бойынша үміткерлер әділқазылар кезкелген жерінен бастап берген Шәкәрімнің 20 өлеңін мәнерлеп жатқа оқып, сонымен қатар олар ақынның өмірі мен шығармашылығы туралы сұрақтарға жауап берді.

Байқау қорытындысы бойынша жүзден жүйрік шыққан, қай өлеңін де мүдірмей оқыған, әділқазылар тарапынан болған сұрақтарға толымды жауап берген Тараз қаласының 6 сынып оқушысы – Қайрат Айханым бас жүлдеге ие болды. І орынды Шәкәрім өлеңдерін нақышты орындаған, сұрақтарға өз ойымен тұшымды жауап берген Шымкент қаласының 5 сынып оқушысы Кәдірхан Дінмұхаммед иеленді. ІІ орынды өнерлерімен көзге түскен дарынды үш үміткер бөлісті. Олар: Батыс Қазақстан облысы Орал қаласынан 6 сынып оқушысы - Әміртай Айару, Қызылорда облысы Қазалы ауданынан 7 сынып оқушы – Жеңісбек Гулназ, Шығыс Қазастан облысы Алтай ауданынан Айырбай Аружан. ІІІ орынды  3 үміткерлер:   Павлодар облысынан келген 7 сынып оқушысы - Бахберген Гүлназ, Қостанай облысы Жангелді ауданынан келген 7 сынып оқушысы - Қосылбек Айша және Жетісу облысы Жаргент ауданы Әулиеағаш ауылынан келген 5 сынып оқушысы - Азитай Жүрсін иеленді. Қалған қатысушыларға да ынталандыру сыйлықтары мен Алғыс хаттар табысталды. Бас жүлде мен І, ІІ, ІІІ орынға ие болған жүлдегерлер бағалы сыйлықтар мен Дипломдармен марапатталды.

Байқауға шәкірттерін үкілеп алып келген жетекшілерге ҚР Мәдениет және спорт вице-министрі Н. Дәуешовтің атынан Алғыс хат, шәкірттерін мықты дайындаған ұстаздарға М. Әуезовтің 125 жылдығына арналған мерейлі төс белгісін,  ең үздік өнер көрсеткен оқушыларды дайындаған Жасұзақова Қойсынай мен Хайруллина Кулзипаға және бас жүлде алған жүлдегердің жетекшісі Бекпатшаева Әйгерімге «Қазақстанның білім беру ісінің қайраткері» төсбелгісі табысталды. Балаларына қолдау білдіріп, дарынды етіп тәрбиелеген ата-аналарға да төсбелгі және бағалы сыйлықтар мен Алғыс хаттар берілді. Осы байқау кезеңдерінде үлгілі дайындықтарымен көзге түскен кітапханалар ҚР Мәдениет және спорт вице-министрі Н. Дәуешовтің атынан Алғыс хаттармен марапатталды.