Кітапхана қызметкері 24 қазан – кітапханашылар күніне орай Жуалыда бас қосқан кітапханашылар семинарына қатысып қайтты.

Қазақстан Республикасы Ұлттық академиялық кітапханасының «Ғылым, менеджмент және маркетинг» қызметінің жетекшісі Бекмұханбет Айбала Қанатбайқызы және Ш.Уәлиханов атындағы Жамбыл облыстық кітапхана директоры Абдинова Эльмира Елеусізқызы бастаған облыстық, қалалық, аудандық, ауылдық кітапханалар қызметкерлері Бауыржан Момышұлы атындағы ауылдың кіре берісіндегі батырға арналған мемориал ескерткішке гүл шоқтарын қойып, батырдың рухына тағзым етті.Шараны Жамбыл облысы әкімдігінің мәдениет, архивтер және құжаттама басқармасы, Ш.Уәлиханов Жамбыл Облыстық Кітапханасы, Жуалы аудандық мәдениет және тілдерді дамыту бөлімі, Жуалы аудандық орталық кітапханасы ұйымдастырды.

• Сондай-ақ семинарға қатысушылар Жуалы ауданы Талапты ауылындағы жазушы Шерхан Мұртазаның  әдеби-мемориалдық музейімен танысты.

• “Кітапханалардың тиімділігін талдау: іске асырылған жоспарлардан жаңа идеяларға дейін” кітапханалық конвет барысында семинарға келген қонақтар Жуалы аудандық орталық кітапханасының жұмысымен танысты. Жуалы аудандық мәдениет үйінің алаңында «Жерұйық мекені – Жуалы» этно-ауыл көрме-галлереясында салт-дәстүрімізді дәріптеу мақсатында «Бесікке салу»,  «Тұсаукесер» көрсетілімдерін тамашалады.

• Жамбыл облысы әкімдігінің мәдениет, архивтер және құжаттама басқармасының басшысы Ерлан Жүнісбай кітапханашыларды кәсіби мерекелерімен құттықтап, бірқатар кітапхана қызметкерлерін Алғыс хатпен марапаттады.

• Әрі қарай ҚР Ұлттық академиялық кітапханасының Ғылым, менеджмент және маркетинг қызметінің жетекшісі Бекмұханбет Айбала Қанатбайқызы Жуалы аудандық мәдениет үйінде Ұлттық Академиялық кітапхана басшысы Ғазиза Құдайбергенқызының атынан кітапхана саласын дамытуға айрықша үлес қосқан өңір кітапханашыларына марапаттарды табыстап,  «Кітап оқу – ұлт мәдениетінің бір бөлігі ретінде» тақырыбында ашық дәрісін оқып, «Заманауи кітапханананың келбеті» тақырыбында форсайт-сессия өткізді.