Кітап апталығының аясында «Кітапхана саласының ашылмаған континенті» атты семинар, тренингтер ұйымдастырылды.

24 Сәуір 2024

Дүниежүзілік кітап және авторлық құқық күні мен Қазақстан Республикасы Ұлттық академиялық кітапханасының 20 жылдығына орай  өтіп жатқан «Кітапхана. Кітап. Оқырман» атты кітап апталығы бүгін маңызды шаралармен жалғасты.  

Кітапхана ісін жаңашылдық пен жасампаздық негізді дамытуға арналған «Кітапхана саласының ашылмаған континенті» атты семинар, тренингтер ұйымдастырылды.

Жиналғандарға ҚР Парламент Сенатының депутаты Нұртөре  Жүсіп «Озық ойлы ұлт болам десең...» атты дәріс оқыды. Мұнда ол қазіргі қоғамның алдында тұрған мәселенің бірі – бүгінгі жас жеткіншектің бойына бәсекеге қабілетті құндылықты қалыптастырып, дамытуға айрықша көңіл бөлу қажет екенін айта келіп, халықтық тәрбие беру тәсілдерімен бөлісті.

Сонымен қатар, М.Мақатаев залында ақын-жазушы Ильяс Юсупжановтың  «Қазақ хандары - Керей мен Жәнібек туралы» комикстердің таныстырылымы өтті. Жоба бүкіл қазақ хандығын қамтып, антропология мен тарихи фактілерді көркем, заманауи форматпен жеткізуді мақсат етеді.

«Жергілікті иллюстраторлар мен дизайнерлердің мүмкіншілігін танытатын, қазақ тарихын жастарға жаңа үлгіде ұсынып отырған отандық өнімге бүгінде сұраныс жоғары»- дейді автор.

Дәл осы күні әдебиетші Ақерке Асан кітап оқудағы пайдалы әдеттер турасында пайдалы  лайфхактармен бөліссе, журналист, тележүргізуші  Айнұр Омар «Менің өмірімдегі кітаптар» атты тренинг өткізді.

 Ал жеке брендинг маман Айжан Киманова оқырмандарға «Мақсатқа қалай жетуге болады?» атты  коуч-сессия ұсынды.

Бүгінгі күнгі жоспарланған шаралар легін «Сөйлеу мәнері» мәнерлеп оқу үйірмесінің мүшелерімен кездесу қорытындылады.

Биыл ҚР Ұлттық академиялық кітапханасының құрылғанына – 20 жыл. 2004 жылдың 23 сәуіріндегі ҚР Үкіметінің № 461 Қаулысымен құрылған кітапхана халықаралық аренада жылдан жылға өз мәртебесі мен беделін биіктетіп отырған ірі ақпараттық-анықтамалық, ғылыми-өлкетанулық, мәдени-ағартушылық орталықтардың бірі.

 

Іс-шаралар күнтізбесі

28
May

16:00

Португал әдебиетінің бұрышына кітаптарды салтанатты табыстау рәсімі Португал тілі күніне орай

Шетел әдебиеті залы

29
May

11:00

Дөңгелек үстел: «Құдайберген Жұбанов тағылымы» ғалым Құдайберген Жұбановтың 125 жылдық мерейтойына орай

Конституция залы