ИЛЛЮСТРАЦИЯЛЫҚ КІТАП КӨРМЕЛЕРІНІҢ АШЫЛУЫ

17 January 2022

Кітапханада «Мәңгілік ел құндылықтары. Ардақ тұтар алыптары» Балалар жылына орай ұйымдастырылған «Менің сүйікті кітаптарым» атты кітап көрмелерінің ашылуы болып өтті.

Іс-шараның мақсаты – ұлттық құндылықтарды жаңғырту, дәріптеу, ел руханиятын көтерген тұлғалардың тағылымды шығармашылығымен таныстыру және «2022 – Балалар жылына» орай балаларға арналған әдебиеттерді насихаттау. 
Бұл көрмелердің ашылу салтанатында оқырмандар назарына бірнеше кітап көрмелері ұсынылды. Атап айтатын болсақ, ЮНЕСКО-ның мерейтойлар тізіміне енген Ахмет Байтұрсынұлының туғанына 150 жыл, Роза Бағланованың туғанына 100 жыл, Мұхтар Әуезовтың туғанына 125 жыл, Ғабит Мүсірепов пен Ғабиден Мұстафиннің туғанына 120 жыл, Күләш Байсейітованың туғанына 110 жыл, сонымен қатар Нұр-Сұлтан қаласының құрылғанына 25 жыл мен көптеген зиялы қауым өкілдері мен қоғам қайраткерлерінің қазақ әдебиеті тарихына қосқан еңбектері насихатталады.  
«Мәңгілік ел құндылықтары. Ардақ тұтар алыптары» атты кітап көрмесі бірнеше бөлімнен тұрады: 

- «РӘМІЗДЕР – ЕЛДІГІМІЗДІҢ ЕҢСЕСІ, ТЕҢДІГІМІЗДІҢ ТІРЕГІ» атты бөлімде ҚР Мемлекеттік рәміздері – Елтаңба, Ту мен Гимннің қабылданғанына 30 жыл және «ЕЛ ЖҮРЕГІ – ЕЛОРДА» атты бөлімде елорда Нұр-Сұлтан қаласына 25 жыл толу мерейтойларына орай мемлеттік нышандар мен елорда тарихы туралы әдебиеттер мен еңбектер қойылды. 

-   «ҰЛТТЫҢ ҰЛЫ ҰСТАЗЫ» атты бөлімде ақын, әдебиет зерттеуші ғалым, түрколог Ахмет Байтұрсынұлының 150 жылдық мерейтойына орай ел үшін аянбай еңбек еткен қызметтері мен еңбектері жайында деректер берілді. 

- «ҚАЗАҚ ӘДЕБИЕТІНІҢ АЛЫПТАРЫ» атты бөлімде кеңестік дәуірде қазақ әдебиетінің алтын ғасырын қалыптастыруда ауқымды проза жанрын дамытқан әдебиет алыптары Мұхтар Әуезовтің 125, Ғабит Мүсірепов пен Ғабиден Мұстафиннің 120 жылдық мерейтойларына орай тың деректер мен шығармалары жайында ақпараттар құрайды. 

- «МӘҢГІЛІК ЕЛДІҢ КЕМЕҢГЕР ТҰЛҒАЛАРЫ» атты бөлімде белгілі майдангер жазушылар мен ғалымдар Әди Шәріповтың, Жұмағали Саинның және Зейін Шашкиннің 110, Әзілхан Нұршайықов пен Сырбай Мәуленовтың 100 жылдық мерейтойларына орай, қазақ әдебиетін зерттеуші ғалымдар З. Қабдолов, С. Қирабаев, Т. Кәкішев, М. Жолдасбеков, А. Гаркавец сынды ғалымдар туралы кітаптар және олардың әдебиет тарихына қосқан еңбектері жайындағы мәліметтермен танысуға болады.

- «ЕСІМІН ЕРЛІКПЕН ЖАЗҒАН ҚАҺАРМАНДАР» бөлімінде қазақтың тұңғыш әскери ұшқышы Хиуаз Доспанованың, Кеңес Одағының Батыры Мәншүк Мәметованың, авиация генерал майоры, Кеңес Одағының екі мәрте батыры Талғат Бигелдиновтердің 100 жылдық мерейтойларына орай халық қаһармандарының ерліктері жайында мәліметтер ұсынылды. 

- «ӘН ӘЛЕМІНІҢ ПАДИШАСЫ» атты бөлімде ЮНЕСКО шеңберінде атап өтетін мерейтойлар тізіміне кірген Роза Бағланованың туғанына 100 жыл толуына орай ән өнерінің хас шебері жайында әдебиеттер көрмесі және «ҚАЗАҚТЫҢ БҰЛБҰЛЫ – КҮЛӘШ БАЙСЕЙІТОВА» Белгілі КСРО Мемлекеттік сыйлығының лауреаты, халық әртісі Күләш Байсейітованың туғанына 110 жыл толуына орай қазақ ән өнеріне қатысты ноталар мен фотосуреттер қамтылды.

-«ЕЛ ЕСІНДЕ ЕРЕН ТҰЛҒАЛАР» атты бөлімде аса көрнекті мемлекет және қоғам қайраткері Дінмұхаммед Қонаевтың, Шерхан Мұртаза, Нұрғожа Ораздың туғанына 90 жыл, Әнес Сарайдың туғанына 85 жыл, Дүкенбай Досжанның туғанына 80 жыл, Есенғали Раушанның туғанына 65  жылдық мерейтойларына орай әдебиеттер көрсетілген. 
Кітап көрмесі барысында 2022-ТМД халық шығармашылығы және мәдени мұра жылы деп жариялануына орай он бір мемлекеттің мәдениетін, тарихын, дәстүрін дәріптейтін әдебиеттер ұсынылды.  

«2022 – Балалар жылы» деп жариялануына байланысты «Менің сүйікті кітаптарым» атты балаларға арналған кітап көрмесі ашылады. Іс-шара барысында балалар кітапханасының жас оқырмандары өздерінің өлең жолдарын оқиды.

Балаларға арналған бұл кітап көрмесі 4 бөлімнен тұрады:
- Балаларға арналған классик жазушылардың кітаптары;
- Балалардың ауыз әдебиетіне байланысты, қазақ ертегілері, қазақ ауыз әдебиеті, батырлар жырлары және т.б.
- «Балауса балғын кез» атты бөлімде 3-5 жас аралығындағы бүлдіршіндерге арналған ертегілер мен суретті кітапшалар жинақталған бөлімнен тұрады.
- 2021 жылы мемлекеттік бюджеттен шығарылған кітаптар көрмесі.

Іс-шаралар күнтізбесі

Жуырда
жаңа оқиғалар пайда болады