Бүгін кітапханаға Назарбаев Университеті кітапханасының директоры Джеральд Кавана мен университет қызметкері  Моника Буковска арнайы келіп, кітапхана басшысы  Ғазиза Құдайбергенқызымен танысып, іскерлік келіссөздер жүргізді.

Кездесуде екі кітапхананың басшысы өзара тың идеяларымен бөлісіп, алдағы бірлесіп атқарылар жұмыстарды талқылады.

«Кәсібіміздің болашағын жоспарлауда кітапханалық жұмыстарды бірлесіп атқарудың, серіктестікті нығайтудың маңызы зор. Сіздердің кітапханаларыңызбен іскерлік байланыс орната отырып, қос кітапхананы да академиялық, танымдық жағынан дамытуға дайынбыз» - деген Джеральд Кавана 2024 жылдың 29-31 мамыр күндері Назарбаев университетінде академиялық кітапханалардың дүниежүзілік 13-Еуразиялық конференциясы өтетінін хабарлады.  Шараның мақсаты – академиялық кітапханаларда кітапханалық-ақпараттық қызмет көрсетудің жоғары деңгейін қолдау, дүние жүзіндегі кітапханалар қауымдастығын нығайту жолында ақпараттар мен тәжірибелер алмасу.

IFLA Кітапхана қауымдастығы кеңсесімен бірлесе отырып және Қазақстан Республикасы Ғылым және жоғары білім министрлігі мен Қазақстан Республикасы университеттік кітапханалар қауымдастығының қолдауымен өтетін конференцияға кітапхана саласының және ақпарат ғылымының мамандары, зерттеушілер мен практиктер шақырылады. Конференцияда әлемдік деңгейде кітапхана ісін зерттеп, зерделеп жүрген шетелдік мамандар дәріс оқып, тәжірибелерімен бөліседі. 

Айта кету керек, ҚР Ұлттық академиялық кітапханасының директоры Ғазиза Құдайбергенқызы да аталмыш конференцияда іскерлік тәжірибесімен бөліседі. Сонымен қатар, кітапхана директорының ұсынысы негізінде,  ҚР Ұлттық академиялық кітапханасының жетекшілігімен еліміздегі көпшілік кітапханалардың мамандары да дүниежүзілік 13-Еуразиялық конференциясына тегін қатысуға мүмкіндік алып отыр.

«Назарбаев Университеті кітапханасы еліміздегі ақпараттық ресурстардың ағылшын тілдік коллекциясына ең бай кітапхана екенін білеміз. Бір сөзбен айтқанда, супертехнологиялық кітапхананың мүмкіндігі қай жағынан да жоғары.  Біздің Ұлттық академиялық кітапханада да білімнің барлық саласын қамтитын заманауи, қолжазбалық құжаттар мен бірегей қор бар.  Оқырмандар саны күннен-күнге артып келеді, олардың ақпаратқа еркін және шектеусіз қолжетімділігін қамтамасыз ету мақсатында біз де Сіздермен бірлесе отырып, саланы дамытуға күш салуға дайынбыз»- деді кітапхана директоры Ғазиза Құдайбергенқызы.

Кездесуде академиялық кітапхананың рөлін арттырып, технологиялық жетістіктерді тиімді пайдалануда бірлесіп атқарылатын жұмыстардың жоспары нақтыланды, авто¬мат¬тан¬дырылған кітапханалық-ақпараттық жүйе¬ні көпшілікке ұсынудың біріңғай тиімді жолдары қарастырылды.

Кездесу соңында қонақтар кітапханаға экскурсия жасап, қарашаңырақтың тыныс-тіршілігімен танысты.