«Азаттық» радиосында ұзақ жылдар қажырлы қызмет атқарған, қазақтың баһадүрі Хасен Оралтайдың 90 жылдығына арналған ғылыми - конференция өтті.  Эмиграциядағы қазақ қайраткері, ұлт-азаттық қозғалысты зерттеуші, журналист, жазушы, халықаралық "Алаш" сыйлығының иегері Хасен Оралтайдың мерейтойы «Азаттық» радиосының 70 жылдығымен тұспа - тұс келіп отыр.  Конференция аясында филология ғылымдарының кандидаты, қауымдастырылған профессор Рахима Шәріпқызы Нуриденнің «Азаттық радиосынан сөйлеп тұрмыз» атты кітабының тұсауы кесілді. Кітап ҚР Ұлттық  академиялық кітапхананың қолдауымен әзірленген.

Кітапхананың сирек кітаптар қорында «Азаттық» радиосында қазақ редакциясының басшысы болған Хасен Оралтайдың филология ғылымдарының докторы, академик Р.Нұрғалиға аманаттап тапсырған түрлі құжаттары, өзі жүргізген хабарлары  мен өзінен алынған сұхбаттар, түрлі радиохабарлар сақталған.

Аудиокассетадағы материалдарды негізге ала отырып жазылған еңбектің келешек ұрпақ үшін  тарихи, әдеби, мәдени маңызы орасан.