29 мамырда Қазақстан Республикасы Ғылым және жоғары білім министрлігі мен Қазақстан Республикасы Жоғары оқу орындарының кітапханалар қауымдастығы қолдауымен  "Байланыс, ынтымақтастық және құрастыру: мамандығымыздың болашағын қамтамасыз ету үшін кітапханалық бірлестіктер мен серіктестіктерді дамыту" тақырыбында 13-ші Еуразиялық академиялық кітапханалар конференциясы басталды.
Шараның мақсаты – академиялық кітапханаларда кітапханалық-ақпараттық қызмет көрсетудің жоғары деңгейін қолдау, дүние жүзіндегі кітапханалар қауымдастығын нығайту жолында ақпараттар мен тәжірибелер алмасу. 
Назарбаев Университетінің кітапханасы ИФЛА Кітапхана қауымдастығы басқармасымен бірлесе отырып ұйымдастырған конференцияға Ресей, Қытай, АҚШ, Бельгия, Португалия, Финляндия, Ирландия, Түркия, Үндістан, Уругвай және Қазақстанның барлық өңірлерінен келген кітапхана жетекшілері мен ақпарат мамандары тартылған.

Конференцияға ҚР Ұлттық академиялық кітапханасының директоры Ғазиза Құдайбергенқызы  мен директордың ақпараттық ресурстар жəне жастар саясаты жөніндегі орынбасары Нұржан Жолдыбалинов қатысуда.
Сонымен қатар, маңызды шараға ҚР Ұлттық академиялық кітапхана басшылығының ұсынысымен ҚР Мәдениет және ақпарат министрлігіне қарасты өңір кітапханашыларының да тегін қатысуына мүмкіндік жасалған. 

Конференцияда әлемдік деңгейде кітапхана ісін зерттеп, зерделеп жүрген шетелдік мамандар дәріс оқып, озық тәжірибелерімен бөліседі.  
ҚР Ұлттық академиялық кітапханасының  директоры Ғазиза Құдайбергенқызы  «Қазақстан кітапханаларының даму стратегиясы: уақыт талабы», директордың орынбасары Нұржан Нұрланұлы 
«Қазақстан Республикасында бірыңғай автоматтандырылған кітапханалық ақпараттық жүйені енгізудің артықшылықтары мен болашағы» тақырыптарында баяндамалар жасады.