Бүгін ҚР Ұлттық академиялық кітапханасында Қазақстан Республикасының материалдық емес мәдени мұраны қорғау жөніндегі Ұлттық комиссия төрағасының орынбасары Рустам Музафаровпен кездесу өтті. Кездесу барысында өзара ынтымақтастық пен алдағы жоспарлар талқыланды. Қазақстан Республикасында тарихи материалдық емес және құжаттық мәдени мұраны зерттеу, анықтау және сақтау тәжірибесіне сүйене отырып, осы саладағы жұмысты әрі қарай жалғастырудың және ынтымақтастықты нығайтудың маңыздылығы айқындалды.

ЮНЕСКО-ның «Әлем жады» бағдарламасының мақсаты – Қазақстан Республикасының мәдениет саласындағы мемлекеттік саясат басымдықтарына сәйкес келеді. Түркістанда өткен Ұлттық құрылтайда Президент Қасым-Жомарт Тоқаев  елі­міз­дің мәдени және таби­ғи мұ­ра­ларын ЮНЕСКО-ның Дүние­жүзі­лік мұра тізіміне енгізуге қатысты нақты тапсырмалар берген еді. Президенттің айтуынша, ата-бабаларымыздың мол мұрасын бірізді жаңғыртып, әлемге насихаттау қажет.

Рустам Рахымұлы Қазақстан Республикасының материалдық емес мәдени мұраны қорғау жөніндегі Ұлттық комитеті ұсынған жобаға алғаш рет ЮНЕСКО халықаралық қорынан қаржы бөлінгенін атап өтті. Атап айтқанда, Қазақстанға материалдық емес мәдени мұраның ұлттық тізімін жаңартуға дайындық және материалдық емес мәдени мұраны қорғау жөніндегі конвенцияны жүзеге асыруда бес аймақтағы жергілікті қауымдастықтардың әлеуетін арттыру үшін 99 600 АҚШ доллары бөлінді. Айта кетейік, Қазақстан ЮНЕСКО-ның бұл халықаралық көмек механизмін алғаш рет пайдаланып отыр.

Сондай-ақ, Рустам Рахымұлы жобаға жергілікті музейлер, мұрағаттар мен кітапханалардың қатысуының маңыздылығын атап өтті және барлық ғылыми-тәжірибелік іс-шараларды Қазақстан Республикасының Ұлттық академиялық кітапханасы базасында өткізуді ұсынды. Өз кезегінде сөз алған кітапхана директоры Ғазиза Құдайбергенқызы Ұлттық комитеттің құрамымен бірлесе отырып, «Әлем жады»  бағдарламасының негізі құжаттар мұрасын жинақтаудағы, бірыңғай Ұлттық каталог құру мақсатында жасалып жатқан және алда атқарылатын жұмыстар жайын сөз етті.