Бүгін ҚР Ұлттық академиялық кітапханасы мен С.Сейфуллин атындағы Қазақ агротехникалық зерттеу университеті арасында  Ынтымақтастық туралы меморандумға қол қою рәсімі өтті.

Бұл меморандум білім, ғылым және мәдениет саласында бірлесіп жұмыс істеуге жаңа мүмкіндік береді. Ғылыми-зерттеу, талдау және білім беру қызметі саласындағы ынтымақтастық пен өзара іс-қимылды нығайту мақсатында ұйымдастырылған шараға арнайы келген университет қызметкерлері әуелі кітапхананың тыныс-тіршілігімен танысты.

Одан соң қос тарап өкілдері кітапхананың М.Жолдасбеков залында  С.Сейфуллин атындағы Қазақ агротехникалық зерттеу университет оқытушысы Ө.Р. Шнановтың студенттерге өткізген ашық сабағына қатысты.

Меморандум әдеби және кітап жинақтармен алмасуды, ғылыми-танымдық іс-шараларды бірлесіп ұйымдастыруды, сондай-ақ ұлттық бірлік пен келісім саласындағы мемлекеттік саясатты ілгерілетеді.

Құжатқа С. Сейфуллин атындағы Қазақ агротехникалық зерттеу университетінің ректоры, ҚР ҰҒА академигі Тіреуов Қанат Маратұлы мен ҚР Ұлттық академиялық кітапханасының басшысы Сейітова Күміс Қарсақбайқызы қол қойды.

Бұл – ҚР Ұлттық академиялық кітапханасы мен еліміздегі білім беру мекемелерінің арасындағы өзара іскерлік байланысты нығайтуға, ғылыми-зерттеу базасын дамытуға бағытталған кезекті ынтымақтастық шарасы.