«Ұлы дала перзенті» кітабының тұсаукесері

ҚР Ұлттық академиялық кітапханасында «Ұлы дала перзенті» атты кітаптың таныстырылымы өтті.

Авторлары – Нәбиолда Кемешов пен Нұрғайни Мұқанова.

Бұл кітап – тыл еңбеккері, Қазақстандағы ең алғашқы комбайнды тізгіндегендердің бірі – бала комбайншы Айтжан Башимованың өмір және еңбек жолына арналған тағылымды туынды.

Айтжан Башимова 1941 жылы соғыс басталғанда небәрі 13 жаста болып, Өскемен қаласындағы №7 кәсіптік-техникалық училищеге оқуға түседі. Механизатор мамандығын алып, 14 жасынан бастап комбайн тізгіндейді.

Елге еткен елеулі еңбегі жоғары бағаланып, 35 жасында Қазақ ССР Жоғары Кеңесінің депутаты болып сайланады. «Еңбек Қызыл Ту» орденімен, «1941-1945 жылдары Ұлы Отан соғысында көрсеткен ерен ерлігі үшін» төсбелгісімен марапатталған.

Кітапта архивтік деректер мен ауылдастарының естеліктері топтастырылған. Таныстырылым барысында зиялы қауым өкілдері, қонақтар мен қатысушылар сөз сөйлеп, еңбек адамының ерлігі жас ұрпаққа үлгі екенін атап өтті.

Іс-шараға оқырмандар, БАҚ өкілдері, кітапханашылар мен ұстаздар қатысты.