Кітапханада Қазақстан Республикасы Ғылым және жоғары білім министрлігі Ғылым комитеті М.О. Әуезов атындағы Әдебиет және өнер институтының 90 жылдық мерейтойы аясында «ҰЛТТЫҚ ӘДЕБИЕТТАНУ МЕН ӨНЕРТАНУ: ТАРИХ ТАҒЫЛЫМЫ ЖӘНЕ ЗАМАНАУИ ІЗДЕНІСТЕР» атты салтанатты жиын өтті. 

Жиын барысында қазіргі әдебиеттану мен өнертану ғылымының өзекті мәселелері талқыланып, М.О. Әуезов атындағы Әдебиет және өнер институтының әр жылдары жарық көрген ғылыми зерттеулерінің, академиялық жинақтарының таныстырылымы өтті. Атап айтқанда, Ахмет Байтұрсынұлы, Мағжан Жұмабаев шығармаларының академиялық толық жинақтары және институт кітаптарының тұсаукесері ұйымдастырылды.

«Әуезов музей-үйі» жәдігерлерінің көрмесі, ғылыми жобалар мен атқарылған жұмыстардың қорытындысы, әдебиеттану, өнертану бағытында пікір алмасулар да осы шара барысында жүзеге асты. 

М.О.Әуезов атындағы Әдебиет және өнер институты шығарған ғылыми еңбектер мен кітаптар кітапхана қорына сыйға берілді. Енді бұл еңбектер ҚР Ұлттық академиялық кітапханасының ҚазҰЭК электронды порталына енгізіледі (kazneb.kz). Институт директоры, ҚР ҰҒА академигі, филология ғылымдарының докторы Кенжехан Ісләмжанұлы Матыжанов пен кітапхана басшысы Ғазиза Құдайбергенқызы ынтымақтастық меморандумына қол қойды.

Шараға мемлекет және қоғам қайраткерлері, Сенат, Мәжіліс депутаттары, белгілі әдебиеттанушы және өнертанушы ғалымдар қатысты.