Қазақстан Республикасының Мәдениет және ақпарат министрлігінің қолдауымен Қазақстан Республикасының Ұлттық академиялық кітапханасында  16 сәуір күні  Ұлттық кітап күніне орай «Ұлт және ұлттық кітап» атты ашық есік күні өтті. 

         Кітапты сақтап, қоғамға жан-жақты насихаттауды, интеллектуалды жастарды ынталандыру мен мәдени құндылықтарымызды халыққа жеткізуді мақсат ететін апталықтың бірінші күні кітапханада түрлі танымдық, тақырыптық және инновациялық жобалар, кітап және сурет көрмелері, дөңгелек үстел, шеберлік сағаттары, әдеби кештер т.с.с шаралар  ұйымдастырылды.

           Шараның салтанатты ашылуында сөз алған кітапхана директоры Күміс Сейітова жиналғандарды мерекемен құттықтап, апталықтың ашылғанын  ресми хабарлады.

           Одан соң жиналғандар кітапхананың үшінші қабатында жабдықталған «Коворкинг» орталығының салтанатты ашылуына куә болады.

            Коворкинг орталығы кітапхананың қызмет көрсету деңгейін жайлылық пен жаңашылдыққа негіздеп, заманауи талаптарды ескере отырып құрылған орын. Мұнда оқырмандарға бірлесіп жұмыс істеуге, оқуға, пікір алмасып, білім жетілдіруге мүмкіндіктер мол. Бұл білім мен инновацияны біріктіру арқылы идеяларды жүзеге асыратын орталық болмақ.