ҚР Ұлттық академиялық кітапханасында суретші-аниматор, иллюстратор Аңсаған Мұстафаның  «Сөйле, сурет!» атты  кезекті сурет көрмесі өтті. Қоғамда көпшілік ортаға серпін беріп жүретін ойы озық, өнерлі, сергек жан иесі көрмесіне суретшінің 40-тан астам суреттері қойылып, оқырманы мен көрерменіне түрлі ой саларлық және болып жатқан уақиғалар мен қоғамдағы өзгерістерден тұратын композициялар ұсынылды.

Аңсаған Мұстафа суреттері – әлеуметтік мәселелер, әсіресе отбасындағы зорлық-зомбылық, ішімдік, жасанды түсік жасау мәселелері мен әкемен бала арасындағы қарым-қатынастары және т.б. әлеуметтік тақырыптарды кеңінен қамтыған.

Жұмыстары графика техникасында орындалған және бүгінгі таңда шығармашылығы ғаламтор пайдаланушыларының арасында талқыға түскен және зор танымалдылыққа ие. Оның қазақ жастарына арнап салынған суреттері түрік, жапон, грузин, қырғыз, ағылшын, орыс және тағы да басқа оншақты тілдерге аударылып, әлемге тарады. Сонымен қатар, біраздан бері ұлттық нақышта, әртүрлі тақырыпта суреттер салынған өз футболкалары мен түрлі кәде сыйлы магнитті жапсырмалары да бар.

Аңсаған Мұстафа 1979 жылдың 12 қыркүйек айында, Атырау облысы Миялы ауылында дүниеге келген. 1997 жылы Алматы қаласының сурет колледжін бітіріп, Жүргенев атындағы Өнер академиясының графикалық дизайн бөлімінде оқыған.

Көрмеге өнер мектебінің оқушылары мен студенттері, көркем өнермен айналысатын шеберлер және барша өнерсүйер қауым қатысты.