Қазақстан Республикасы Мәдениет және ақпарат министрлігінің қолдауымен ҚР Ұлттық академиялық кітапханасында белгілі жазушы, драматург, Қазақстанның еңбек сіңірген қайраткері, Қазақстан Республикасының Абай атындағы мемлекеттік сыйлығының лауреаты, Франц Кафка медалінің иегері, профессор Роза Қажығалымқызы Мұқанованың 60 жас мерейтойына арналған «Роза Мұқанова шығармашылығы: әдебиет, театр, кино» халықаралық ғылыми-практикалық конференциясы өтті.

           Рухани кеш аясында қонақтар  мерейтой иесін құттықтап, шығармашылығы жайлы баяндамалар оқыды. Қазақстан Республикасының Мәдениет және ақпарат министрі Аида Балаеваның құттықтау хатын құжаттама және кітап ісі комитетінің төрағасы Рустам Әли табыстап, ықылас гүлін тарту етті.

«Жазушының кейіпкерлері кітаптардан, театр қойылымдарынан, кинолардан оқырман мен көрерменге  етене таныс, жақын, аяулы. Оның шығармалары қазақтың өз кейпін, болмысын, қасіретін айқын көрсетіп беретіндей» - деді өз кезегінде сөз алған академик, «Қазақ газеттерінің» Бас директоры Диқан Қамзабекұлы.

Конференцияға  шетелдік ғалымдар, әдебиет және өнер қайраткерлері  мен отандық қоғам қайраткерлері, жазушылар, театртанушылар қатысты.