ҚР Ұлттық академиялық кітапханасында 2024 жылдың 1 наурызында өткен келесі шара – өнертанушы, жазушы Тайф Тәукейұлының «Монғолия қазақтарының театр тарихы» және    «Керуен ғұмыр»  кітаптарының таныстырылымы.
«Монғолия қазақтарының театр тарихы» атты көлемді энциклопедиялық жинақ мемлекеттік тапсырыспен, Алматыдағы «Дәуір» баспасынан жарық көрген. «Керуен ғұмыр» атты ғұмырнамалық кітап Қазақстан Жазушылар одағы мен «Отандастар» қорының қолдауымен басылып шыққан.
«Монғолия қазақтарының театр тарихы» кітабында ұлттық театрдың қалыптасуы, оның негізін қалаушылар, әр кезеңдегі даму үдерісіне атсалысқан тұлғалар туралы баяндалады.
 
«Керуен ғұмыр» кітабы Моңғолияның ішкі өлкелерінде 30-50 жыл мекендеп, еңбек ете жүріп, Ұлы көш басталғанда қызмет-лауазымына, өзге де игіліктерге қарамастан Атажұртқа ат басын бұрған қандастардың ғұмырынан сыр шертеді.
 
«Баян-Өлгейдегі қазақ драма театры – халықтың рухани сұраныс-қажеттілігін лайықты өтеп, мәдениетке жетелеген, өнердің қасиетті қарашаңырағы болған. Баян-Өлгийдегі қазақ музыкалды-драма театрының дамуына Атажұрт Қазақстаннан арнайы шақыртылған мамандардың да көмегі аз болмаған. Бұл туралы да энциклопедиялық жинақта толықтай қамтылған» -деді қос кітаптың авторы Тайф Тәукейұлы .
Шараға зиялы қауым өкілдері, ақын-жазушылар, қаламгерлер, журналистер, оқырмандар қатысты.