«Наурызнама» онкүндігі
ҚР Ұлттық академиялық кітапханасы Мемлекет басшысы Қасым-Жомарт Тоқаевтың Наурыз мерекесін жаңа форматта тойлау ұсынысын барынша қолдап, 14-24 наурыз аралығында «Наурызнамаға» сай түрлі шаралар ұйымдастырды.
14 наурыз – Көрісу күні, амал мерекесіне орай ұжым кітапханаға көрші орналасқан мекеме ҚР Ұлттық архив директоры  Сағила Нұрланова бастаған қызметкерлерді қонақ қылып, көрісу жоралғысын жасады. Сонымен қатар осы күні кітапханаға келетін зиялы қауыммен, тұрақты оқырмандармен арнайы  көрісу рәсімі өтті.
15 наурыз – Қайырымдылық күніне орай  әлеуметтік қайырымды істер марафоны аясында ұжым әлеуметтік жағдайы төмен отбасына барып, жағдай сұрасып, азық-түлікпен көмектесті. Қайырымдылық рәсіміне кітапхана ұжымы толық атсалысты.
16 наурыз – «Ұлттық мәдениеттің негізі –салт-дәстүрлер» атты кітап көрмесі ұйымдастырылды. Кітап көрмесінде Наурыз айы, табиғат,  Жер-Ана, жер бетіндегі тіршіліктің  жаңаруы туралы  берілген  -  «Қазақ халқының салт-дәстүрлері», «Наурызнама», «Ас атасы нан», «Қазақ халқының дәстүрлері той-мереке, сауық-сайран», «Ұлттық ойын», «Қазақтың ұлттық тағамдары», «Қазақтың киіз үйі», «Жеті қазына» т.б  «Наурызнама» концепциясы аясында көтерілген барлық тақырыпқа сай кітаптар мен мерзімді басылымдар ұсынылды. Көрмені кітапхана оқырмандары мен қала қонақтары тамашалады. 
 17 наурыз – Шаңырақ күні деп белгіленді. ҚР Ұлттық академиялық кітапханасында «Отбасымен оқимыз» клубы аясында «Наурыз берекем...» атты мерекелік іс-шарасы өтті.
 Шара барысында  балалар мәнерлеп өлең оқып, ән салып, би биледі. Сондай-ақ әжелеріміз ауылдың алтыауызынан ән шырқап,қазақтың салт-дәстүрі бойынша тұсау кесер рәсімінен көрініс көрсетіп,кеңінен түсіндіріп берді.клубтың отбасы  мүшелері Ұлыстың ұлы күні туралы түсінік беріп, наурыз мерекесінің қазақ халқы үшін құндылығын, ұлттық салт – дәстүріміз бен, әдет-ғұрпымызды байланыстыра насихаттап,  наурыз мерекесінің қазақ даласындағы орны ерекше әрі қастерлі екенін атап, дәстүрлі мерекелерді құрметтеу, отбасылық мерекелеу ерекшеліктерімен бөлісті.
Клуб отырысына клубтың тұрақты мүшелері: Ақмұрзаевтар отбасы,Ерғалиевтар және Әшімхановтар отбасы ,әжелер,ата-аналар, ұстаздар мен оқушылар, кітапхана оқырмандары қатысты .
 18 наурыздағы Ұлттық киім күніне орай кітапхана қызметкерлері мен оқырмандар, қонақтар ұлттық киіммен келіп, ұлттық болмысымыз дәріптелді.  Аталған іс-шараның мақсаты – ұлттық киімнің маңыздылығын көрсету, тарихымен таныстыру, жастар арасында насихаттау. Ұлттық киімді күнделікті өмірге бейімдеу және сәнге айналуына қызығушылығын арттыруға, қолданысын кеңейтуге шақырды. Шараны кітапхана оқырмандары тамашалады, сондай-ақ бастаманы қолдап ұлттық киім киіп келген оқырмандарымыз да болды. 
"Ұлттық спорт күні" дәріптелетін 20 наурызда ұлттық ойын түрлерінің мән маңызын айшықтайтын әдебиеттер жайлы кітапхананың ресми әлеуметтік желілерінде бейнемағлұмат берілді. 
Ұлттық құндылықтарымыздың айшықталар атаулы күндерінің әрбіріне тоқталып, Наурызнаманы дәріптеген кітапхана ұжымы мен оқырмандары  мейрамды ерекше атап өтті. Наурыз мейрамын мерекелеуге қатысқан оқырмандарымызға алғыс білдіреміз.