Бүгін Астанада өтіп жатқан Мәдениет қызметкерлері форумының екінші күні.

Мәдениет және өнер қайраткерлерінің кәсіби мерекесіне арналған форумға қатысып жатқан кітапхана саласының мамандары бұл күні де оқыту семинарларына, тренингтер мен шеберлік сағаттарына қатысты.

Жазушы-публицист, әдеби сыншы Амангелді Кеңшілікұлы «20 ғасырдағы әлем әдебиеті» тақырыбында лекция оқып, белгілі бір ұлт әдебиетінің басқа да әлем халықтары әдебиетімен қарым-қатынасы, рухани алмасулар, көркемдік даму мен ұлттық әдебиеттердің даму деңгейі туралы сөз қозғады.

Сондай-ақ, кітапхана жүйелерін цифрландыру бойынша IT-сарапшы, Syntax Media компаниясының өкілі Зарина Алимова «Кітапханаға арналған цифрлы экожүйе» тақырыбында, ал бизнес-жаттықтырушы, PR-маман, көпшілік алдында сөз сөйлеу бойынша тренер Салтанат Әскербек «Стресске төзімділік: өзіңмен жұмыс» тақырыбында кітапханашыларға арналған тренинг өткізді. Кітапханашылар жан-жақты пікір алмасты.

«Рухани қазына – 2025» республикалық фестиваліне қатысушы кітапханалар мен кітапханашылардың жұмыстарын кәсіби мамандардан құралған қазылар алқасы сарапқа салды. Айта кетейік, фестивальге қатысуға еліміздің көпшілік кітапханаларынан 87 өтінім келіп түскен. Олар 9 номинация бойынша бақ сынауда.