ҚР Ұлттық академиялық кітапханасында 2024 жылдың қорытынды жиыны өтті. Шара барысында кітапхананың белсенді әрі  тұрақты оқырмандарына кітапхана басшысы Ғазиза Құдайбергенқызы «Құрметті оқырман» куәлігін табыс етті.

      «Құрметті оқырман» куәлігіне ие болғандардың қатарында ҚР Парламенті Сенатының депутаты Нұртөре Жүсіп, «Жылқының күші - қуат, сүті - шекер, еті - бал», «Өмір белестері»  кітаптарының авторы, Алматы облысының құрметті азаматы Кенжебек Жамаубайұлы,  Ұлттық Ғылым академиясының академигі, филология ғылымдарының докторы Кәрімбек Құрманалиев, PhD доктор, мәдениеттанушы Абылайхан Қалназаров, журналист, оқытушы-аудармашы, кітапханадағы «Әке мен бала» клубының жүргізушісі Ернат Рахметолла, зейнеткер Жұмагелді Өтелбаев, құқық қорғау органдары академиясының докторанты Аян Бекежанов, PhD доктор, түркітанушы Бақтияр Бутеев, «Жастар» ғылыми-зерттеу орталығының ғылыми қызметкері Фарида Мусатаева, саяси ғылымдарының докторы  Біржан Бакумбаев, сонымен қатар  «Neotech digital school» мектебінін  4 сынып оқушысы Дінмұхаммед Сатыбалдин, №79 мектеп-лицейінің 7 сынып оқушысы Аяулым Әділ бар. «Құрметті оқырман» атағына ие болған оқырмандарға кітапхананың барлық құрылымдық бөлімдерінде тапсырысқа кезексіз қызмет көрсетіледі.

       Куәлікке және мерекелік сыйлыққа ие болған қонақтар, кітапхана ұжымына алғыстарын білдіріп, жаңа бастамаға сәттілік тіледі.

     «Ғимаратқа кірген бойдан жылы қарсы алып, жөн көрсетіп жүретін кітапханашыларға алғысым шексіз. Осы кітапханадағы құнды кітаптар арқылы бірнеше кітап жазып шықтым. Кітапхана менің тұрақты екінші үйім болды», - деп өз алғысын жеткізді зейнеткер Кенжебек Жамаубайұлы.

            Жыл қорытындысында кітапхананың бірнеше қызметкері лауазымдық міндеттерін адал атқарғаны, жұмысты, оның ішінде айрықша күрделі және шұғыл жұмыстарды сапалы орындағандары үшін Архив, құжаттама және кітап ісі комитетінің төрағасы Рустам Алидің және кітапхана басшысы Ғазиза Құдайбергенқызының Алғыс хаттарымен марапатталды.