ҚР Ұлттық академиялық кітапханасында Ұлы Отан соғысының ардагері, журналист, жазушы Әскен Нәбиевтің туғанына 100 жыл толуына орай «Бармысыңдар, армысыңдар бабалар!»  атты еске алу кеші өтті.

Кеште ұлт жаны сынға түскен уақытта қару мен қаламын қатар ұстаған жазушы Әскен Нәбиевтің  өмірі мен шығармашылығы жайында жан-жақты сөз болды. Жиналғандар қарымды қаламгерге арналған деректі фильмді тамашалады. Кешті  ақын, жыршы, Қазақстанның еңбек сіңірген қайраткері Баянғали Әлімжанов жүргізді.  Жазушы, журналист – Мағжан Садықанұлы  көсемсөз шебері Ә. Нәбиев жайлы баяндама оқыды.

Қаламгер1959 жылы «Перзент» атты тұңғыш жинағын «Жазушы» баспасынан шығарады. Одан соң жазушының «Гүлзи» (1965), «Шолпан» (1969), «Ауыр апталар» (1972), «Бейтаныс бойжеткен» (1977), «Қанат қаққанда» (1979), «Бел-белестер» (1981), «Шынығу шағы» (1984), «Алдыңғы толқын» (1987), «Қала ортасындағы қамал» (1992), «Алақайғы» (1993), «Майдан әңгімелері» (1998), «Шерулі жылдар» (2001) тағы басқа жиырмадан астам повестер мен әңгімелер жинағы жарық көрген. Әскен Набиевтің 85 жылдығына орай  «Фолиант» баспасынан екі томдық таңдамалылар жинағы шықты.

Еске алу кешінде сөз алған филология ғылымдарының докторы, профессор Серік Негимов өмір­шең туын­дылары ­рухани қорды ба­йытқан Әскен Нәбиевтің жазушылығынан бөлек ақындығын, қарапайымдылығы мен әзілге, әнге құштарлығын тіліне тиек етті.

 Шарада жазушының ұлы, қоғам қайраткері – Марат Әскен­­ұлы әкесі жайлы жай­­дары естелі­ктерімен бөлісті.

Әскен Нәбиевтің 100 жылдық мерейтойы ҚР Мәдениет және Ақпарат министрлігінің қолдауымен былтырдан бері республикалық деңгейде аталып өтіп келеді.  

Шараға белгілі қоғам және мемлекет қайраткерлері, БАҚ өкілдері, журналистер, оқырмандар  т. б. қатысты.