ҚР Ұлттық академиялық кітапханасында «Тұғыры биік тұлғалар» атты иллюстративті кітап көрмесі өз жұмысын бастады.
05 Қаңтар 2024
ҚР Ұлттық академиялық кітапханасында «Тұғыры биік тұлғалар» атты иллюстративті кітап көрмесі өз жұмысын бастады. Жылдың басында дәстүрлі ұйымдыстырылатын көрмеге биыл еліміз бойынша және ЮНЕСКО көлемінде мерейтойлары аталып өтетін тарихи тұлғалар мен ақын-жазушылардың, қазақтан шыққан белгілі мемлекет және қоғам қайраткелерінің архив шежірелері, құжаттары, фотолары, еңбектері, кітаптары мен құнды туындылары қойылды.
Көрменің мақсаты – өскелең ұрпаққа қазақтан шыққан белгілі тұлғаларды, олардың тағылым жолын, туындыларын таныту, кітап оқу мәдениетін қалыптастыру, кітапхананың имиджін көтеру.
«Тұғыры биік тұлғалар» атты иллюстративті кітап көрмесіне биыл 155 жылдығы аталып өтетін халық әртісі, музыка зерттеушісі, композитор А. Затаевичтің, туғанына 145 жыл толатын ағартушы - ғалым, Алашорда қозғалысын құрушылардың бірі - М. Тынышбаевтың, «Боздаланың бозторғайы» атанған К.Әзірбаевтың-140 жыл, сонымен қатар қазақтың үш бәйтерегі – С. Сейфуллин, І. Жансүгіров, Б. Майлиндердің 130 жылдық мерейтойларына орай олардың еңбектері, кітаптары, тарихи деректері топтастырылған.
Сондай-ақ, кітапханаға келушілер қазақтан шыққан тұңғыш академик Қ.Сәтбаевтың (125 жыл), қазақ бейнелеу өнерінің негізін қалаушыларыдың бірі – Ә.Қастеевтің (120 жыл), қазақ өнерінің жарық жұлдызы, талантты актер әрі режиссер – Ш.Аймановтың (110 жыл), Ұлы Отан соғысының батырлары – Р.Қошқарбаев пен Ә.Молдағұлованың (100 жыл) мерейтойларына арнайы дайындалған көрмені тамашалай алады.
Биыл ЮНЕСКО көлемінде ғасырлық тойын өткізгелі отырған Б.Соқпақбаевқа арналған көрмеде классик жазушының шығармашылық мұрасы кең көлемде ұсынылған.
Қоғам қайраткері Ә. Нұрпейісовтың 100 жылдығына, қазақ әдебиетінің қос майталманы – Ә.Кекілбаев пен Ф. Оңғарсынованың 80 жыл мерейтойларына орайластырылған және басқа да белгілі тұлғалардың шығармашылық жолдары жасақталған көрмеге барлығы 500-ге жуық құжат қойылған.
Көрме кітапхана оқырмандарына тұрақты түрде жыл бойы ұсынылады.
Астана және қала қонақтарын таным көкжиегін кеңітіп, тағылымды көрмені тамашалауға шақырамыз!
