ҚР Ұлттық академиялық кітапханасында «Қазақ әдебиеті» республикалық әдебиет, мәдениет және өнер газетінің 90 жылдығына арналған «Әдебиет. Рух. Қоғам» атты дөңгелек үстел  өтті.                                                                      

Ұлтымыздың рухани айнасы, еліміздің әдеби, мәдени өмірін өрнектейтін  басылым – «Қазақ әдебиеті» газетінің жарық көргеніне биыл 90 жыл. Қазақтың талай қабырғалы қаламгерінің қолтаңбасы қалған беделді  басылымның тұңғыш редакторы – Ғабит Мүсірепов болған. Ал әдебиет әлеміндегі үш бәйтерек – Сәкен Сейфуллин, Бейімбет Майлин және Ілияс Жансүгіровтер де дәл осы гезеттің ақылдастар алқасында болды.

Әдеби шараны Қазақстан Жазушылар одағының Астана қаласы филиалының директоры, ақын Дәулеткерей Кәпұлы жүргізді.

«Ғасырға жуық уақыт ішінде газет қалың оқырманы бар, беделді басылымның тарихы тым тереңде жатыр. Ғұмырында ел мүддесі мен ұлт мұратына қызмет еткен абыз басылымның мерейлі тойы баршамызға ортақ», - деген ҚР ҰҒА академигі, Егемен Қазақстан республикалық газетінің бас директоры Дихан Қамзабекұлы қазақ баспасөзінің қара шаңырағына айналған газет ұжымын мерейтоймен құттықтады.

Шараға жиналғандар әдебиет пен мәдениеттің жауһарын теріп, құндылықтың қазығы мен тілдің тазалығын сақтап отырған іргелі басылымның өткені, бүгіні, келешегі жайлы өзекті әңгіме өрбітті. 

Дөңгелек үстелге белгілі қоғам және мемлекет қайраткерлері, елімізге танымал ақын-жазушылар, БАҚ өкілдері, қаламгерлер, оқырмандар қатысты.