2025 жылы 17 қараша күні Қазақстан Республикасының Ұлттық академиялық кітапханасында Эстония кітабы жылы аясында Эстония әдебиеті бұрышы мен комикстер көрмесінің ашылу салтанаты өтті.

Іс-шараға Қазақстанға Мемлекеттік іс-сапармен келген Эстония Республикасының Президенті, Жоғары мәртебелі Алар Карис мырза қатысты.

Жобаның мақсаты – эстон мәдениетін, тілін және әдеби мұрасын қазақстандық оқырмандар арасында насихаттау.

Ашылу рәсіміне ҚР Мәдениет және ақпарат министрі Аида Балаева,  дипломатиялық корпустың өкілдері, әдебиет және ғылым саласының тұлғалары, оқытушылар мен студенттер, кітапхана қонақтары қатысты.

- «Биыл біз эстон жазба тілінің 500 жылдығын атап өтудеміз. Осы маңызды мерейтой аясында 2025 жылды «Эстон кітабы жылы» деп жарияладық. Жыл бойы біз әртүрлі бастамалар арқылы кітап оқудың маңызын айшықтаудамыз.Бүгін Қазақстан Республикасының Ұлттық академиялық кітапханасымен бірлесіп, шағын болса да Эстон әдебиеті  көрмесін ашып отырғанымызға қуаныштымыз!» - деді Эстония Республикасының Президенті Алар Карис мырза өз сөзінде.

ҚР Мәдениет және ақпарат министрі Аида Ғалымқызы құрметті қонақтарға алғысын білдіре отырып, шараның тек мәдени ғана емес, терең символдық мәнге ие маңызды оқиға екенін атап өтті.  

Жаңа бұрышта Эстонияның классик және қазіргі заман қаламгерлерінің туындылары, балаларға арналған көркемделген кітаптар, сондай-ақ эстон тіліне аударылған қазақ әдебиетінің жауһарлары мен қазақ тіліне тәржімаланған эстон авторларының шығармалары топтастырылған.

Көрмеге жалпы саны 320-ға жуық басылым қойылған. Соның ішінде 200-ден астамы тікелей Эстониядан әкелінсе, қалғаны ҚР Ұлттық академиялық кітапханасының қорындағы эстон әдебиеті мен жазушылары жайлы эстон, орыс және ағылшын тілдерінде жарық көрген жинақтар.