ҚР Ұлттық академиялық кітапханасында «Бір ел – бір кітап - 2023» республикалық акциясының жиыны өтті, келер жылға оқитын кітап таңдалды.

Қазақстанда «Бір ел – бір кітап» республикалық акциясы 2007 жылдан бастап, ҚР Мәдениет және ақпарат министрлігінің қолдауымен ҚР Ұлттық академиялық кітапханасы мен Қазақстан Республикасының кітапханалық қауымдастығының ұйымдастыруымен өтіп келе жатыр. Республикалық акцияның мақсаты – қазақ әдебиетін насихаттау, қоғамның кітап оқуға деген қызығушылығын арттыру, Қазақстанның әдеби мұрасын зерттеуге мүмкіндік туғызу, өскелең ұрпақтың зияткерлік-рухани дамуы мен ана тіліне деген құрметін көтеру.

Қазіргі заманда оқуға деген қызығушылық бәсеңсіп, жастардың жаппай интернетке иек артуы белең алғанда, «Бір ел-бір кітап» акциясы оқу мәдениетін қалыптастырып, қазақ классиктерінің кеңінен насихатталуына  бірден бір жол салды.

Жоба аясында осы жылдар ішінде мыңдаған түрлі форматта кездесулер, көрмелер, жаңа технологиялық ақпараттар арқылы виртуальды көрмелер, сайттар, челлендждер, байқаулар ұйымдастырылып, оған миллиондаған аудитория тартылды. Құрамында елімізге белгілі ақын-жазушылар мен журналистер, кітапханашылары бар акцияның ұйымдастыру комитеті жылда отырыс өткізіп, өңір кітапханаларынан келген ұсыныстар мен оқырмандардың талғамын ескеріп, қазақ әдебиетінде есімі ұмытылып бара жатқан немесе мерейтойы тұспа-тұс келетін қаламгер шығармасын жыл бойы ел болып оқуға таңдайды.

«2007 жылы Ұлы Абайдың қарасөзін оқудан бастаған акция бүгінде қазақ әдебиетінің ең  таңдаулы 50 классик ақын-жазушысының үздік шығармаларын оқырман қауымға ұсынып, насихаттап келді. Биыл жыл бойына 80 жылдық мерейтойы аталып өткен, қазақ әдебиетінде өзіндік орны бар жазушы – Төлен Әбдіктің шығармаларын ел болып оқыдық. ҚР Ұлттық академиялық кітапханада автордың «Парасат майданы», «Қонақтар», «Ақиқат» және басқа да шығармалары талданып, еліміздің көпшілік кітапханаларында 10 мыңның үстінде шара ұйымдастырылып, оған 400 000-нан аса аудитория тартылған» – деді отырыс барысында сөз алған  ҚР Ұлттық академиялық кітапханасының директоры Ғазиза Нұрғалиева.

Отырыс аясында «Бір ел – бір кітап - 2023» республикалық акциясы қорытындыланып, арнайы  презентация көрсетілді.  «Бір ел – бір кітап - 2024» республикалық акциясы аясында оқуға бірнеше танымал қаламгер ұсынылды. Олардың  арасында  Б.Майлин, Қ.Жұмаділдаев, Т.Әлімқұлов,  Б.Соқпақбаев сынды классик жазушылар бар.

Отырыстың комиссия мүшелері ұсынылған авторлардың ішінен  жазушы, балалар әдебиетінің классигі, 2024 жылы100 жылдығы ЮНЕСКО көлемінде аталып өтетін Бердібек Соқпақбаевты оқуды бірауыздан қолдады. Сонымен, «Бір ел – бір кітап» акциясы аясында 2024 жыл бойына ел болып қазақ прозасына ғажайып сипат әкелген көрнекті қазақ жазушысы Б.Соқпақбаевтың шығармаларын оқу ұсынысы қабылданды.   

Акцияның комиссия мүшелерінің қатарында зиялы қауым өкілдері, ақын-жазушылар, журналистер, Қазақстанның облыстық кітапханалар басшылары болды. Акция отырысы онлайн және офлайн түрде өтті.