ҚР Ұлттық академиялық кітапханасы ұжымы Ш.Шаяхметов атындағы «Тіл-Қазына» ұлттық ғылыми-практикалық орталығының бас директоры  Мақпал Жұмабаймен кездесті.

Жиында «Тіл Қазына» ұлттық ғылыми-практикалық орталығының ғылыми әлеуетін арттыру жолында кітапханамен бірлесе атқарылатын жұмыстары, жасанды интеллект жүйесінде қазақ тілі дамуын дұрыс үйлестіру мәселелері сөз болды.

 «Тіл тағдыры – тұтас елдің тағдыры. Ана тілі – ата-бабамыздан аманат болып келе жатқан асыл мұра. Мемлекеттік тілдің қолданыс аясын кеңейту бойынша атқарылар қызмет ұшан-теңіз» - деген Мақпал Құрманжанқызы осы мақсатта жасалып жатқан жұмыстарға жан-жақты талдау жасап, Орталық қызметінің осы бағыттағы жұмысына қатысты маңызды мәселелерге тоқталды.

Тілді зерттеп, қолданысқа түсірудің озық тәжірибелерін зерделейтін түрлі сала мамандарының басын қосуды қарастыру, Мемлекеттік терминологиялық комиссияда бекітілген терминдер жүйесін жетілдіру мен біріздендіру, қазақ тілінің халықаралық деңгейдегі беделін арттыру жөнінде кеңінен сөз қозғалды.

Кездесуде ҚР Ұлттық академиялық кітапханасының директоры Ғазиза Құдайберген мемлекеттік тілдің қолданыс аясын кеңейтуде кітапхананың қызметі ерекше екенін атады. Тіл үйретуде қазіргі техника мен заманауи технологиялардың мүмкіндіктерін, арнайы электрондық порталдар мен сайттарды, мобильдік қосымшаларды, дыбыстық көмекшілерді пайдаланудың маңызы зор екенін тілге тиек етті.

Кездесу еркін пікір алмасу форматында өтті. Кітапхана қызметкерлері орталық әзірлеген цифрлық жобалармен танысты. Қазіргі уақытта «Емле.кz», «Termincom.kz», «Sozdikqor.kz», «Qazcorpora.kz», «Balatili.kz», «Tilqural.kz», «Аbai institute» жобаларының халыққа қолжетімді болып отырғандығы сөз болды. Алдағы уақытта қазақ тіл білімінің ғылыми электрондық кітапханасы, электрондық құжаттар қоры, «Шеттілдік терминдердің автоматтандырылған жүйесі», «Qazgramma» жобасы, көру қабілеті төмен азаматтарға арналған экрандық диктор қосымшасы қолданысқа берілетіндігі айтылды.