Алматы облысының әкімдігі мен Қазақстан Республикасының Ұлттық академиялық кітапханасының ұйымдастыруымен көрнекті жазушы, балалар әдебиетінің классигі Бердібек Соқпақбаевтың 100 жылдығына арналған шығармашылық байқаудың жеңімпаздарын марапаттау рәсімі әрі қаламгердің шығармашылығына арналған әдеби кеш өтті.

         Республикалық байқау 2024 жылдың 10 ақпанында басталып, конкурстық жұмыстар 31 наурызға дейін қабылданды. Байқауға еліміздің әр өңірінен түрлі номинациялар бойынша 200-ге жуық 5-10 сынып аралығындағы оқушылар қатысып, ерекше белсенділік танытты.

         Байқау қорытындысына Алматы облысы әкімдігінің кітапхана ісі, тарихи-мәдени мұра, музейлер жұмысын ұйымдастыру бөлімінің Басшысы Домбай Гүлнұр Келісқызы және жазушы, ҚР Мәдениет қайраткері Толымбек Әбдірайым, сыншы, Халықаралық «Алаш» әдеби сыйлығының лауреаты Амангелді Кеңшілікұлы, балалар ақыны Серікбол Хасан, ақын, жазушы Ұларбек Нұрғалым, ҚР Жазушылар одағының хатшысы, Астана қаласындағы өкілі Дәулеткерей Кәпұлы сынды зиялы қауым өкілдері қатысты.  

         «Бұл байқау кез келген жас автордың шығармашылық дамуына, дүниетанымы мен рухани білімін жетілдіруге тамаша мүмкіндік берді. Байқауды ұйымдастырудағы басты мақсат қазақ руханиятының көрнекті өкілі, балалар әдебиетінің классигі, ақын Бердібек Соқпақбаевтың шығармашылығын насихаттау, артында қалған әдеби мұраларын жаңғырту, жазушы есімін болашаққа жеткізу жолындағы рухани жұмыстарды жалғастыру болатын»,- деді Гүлнұр Келісқызы.

         Байқау қорытындысында проза, поэзия, комикс жанрлары  бойынша үздік деп танылған қатысушылар әр өңірден шараға  арнайы келді.

        Байқау нәтижесінде  Ақмола облысынан келген  Нұртас Cъезұлы бас жүлдені жеңіп алды. Жүлделі І орынға Қызылорда облысы, Қазалы ауданы, Әйтеке би кентінің оқушысы Ернар Жәдігер лайық деп танылды. Әдеби байқаудың ІІ орынын   Жетісу облысы, Талдықорған қаласынан  келген Амир Арсланұлы мен Ақмола облысының оқушысы Еркеназ Серікқызы өзара бөлісті. Ал ІІІ орын Ақмола облысы,  Целиноград ауданы, Қоянды ауылынан келген Аясын Әбдіманапқа, Алматы қаласынан қатысқан үміткер Нұрайым Нұрғалиге және Павлодар облысы, Баянауыл ауылынан келген  Ясмин Нұржанқызына бұйырды.  Алматы қаласынан қатысқан Арын Айғаным және Жамбыл облысы, Сарысу ауданының оқушысы Асылан Жақыпбеков  ынталандыру сыйлықтарына ие болды. Жеңімпаздарға арнайы сертификаттар мен ақшалай сыйлықтар табыс етілді.