Қазақстан Республикасы Мәдениет және ақпарат министрлігінің қолдауымен ҚР Ұлттық академиялық кітапханасында көрнекті халық жазушысы, абайтанушы-мұхтартанушы, майдангер,  ұстаз Кәмен Оразалиннің «Абайдан соңғы арыстар» атты үш томдық кітабының таныстырылымы өтті.

Биыл туғанына 105 жыл толып отырған жазушы Кәмен Оразалиннің «Абайдан соңғы арыстар» кітабы қазақ халқының даңқты перзенттерінің ел тәуелсіздігі үшін күрескен кезеңін суреттеуге арналған эпикалық роман-трилогия.

Баршаға мәлім, «Алаш» өкіметі 1918 жылдың жазында Орынбор қаласынан Семейге қоныс аударады. «Алаш» өкіметін қазіргі Абай ауданының Шаған өзенінің бойында қарсы алу салтанаты болады. Оған Қызылжар, Қараөткел, Қарқаралы, Көкшетау, Кереку, Сергиополь, Зайсан мен Өскеменнің ел басшылары қатысады. Романда «Алаш» басшылары Әлихан мен Ахмет, Жүсіпбек, Халел, Әлімхандардың сол кезеңдегі іс-әрекеттері жан-жақты суреттеледі. Шәкәрім, Абай баласы Мекайіл, Мұхтарлар да барлық оқиғаларға тікелей араласып отырады. Автор бұл еңбегінде халқымыздың ардагер ұлдарының асқақ бейнесін әр қырынан сомдап, жұртшылық санасында қайта жаңғыртуды мақсат тұтқан. Кітап көпшілік оқырманға арналған.

Шараны ұйымдастырушы жазушының ұлы, ақын, сазгер, Қазақстан Жазушылар одағының мүшесі Елдар Кәменұлы қазақтың бас ақыны Абай Құнанбайұлының 180 жылдық мерейтойы қарсаңында өтіп отырған кітап таныстырылымының маңыздылығына тоқталды. Жиналғандар ұстаз Кәмен Оразалиннің өмірі мен шығармашылығына қатысты деректі фильмді тамашалады.   

Ғалым, тарих ғылымдарының докторы, профессор, Халықаралық педагогика академиясының академигі, Л.Н.Гумилев атындағы Еуразия университетінің ректоры Ерлан Сыдықов, ғалым, әдебиеттанушы,  филология ғылымдарының докторы, профессор Серік Негимов, ғалым, Қазақстан Жазушылар одағының мүшесі, филология ғылымдарының докторы, абайтанушы Тұрсын Жұртбай сынды зиялы қауым өкілдері халқымыздың арда ұлдарының асқақ бейнесін жұртшылық санасында қайта жаңғыртуды мақсат тұтқан еңбекті жан-жақты талдап, «Кәмен Оразалиннің еңбектері – Абай мұрасының өміршеңдігін дәлелдейтін асыл қазына»- деп баға берді.

Шараға  Абай мәдениетін зерттеуші ғалымдар, ақын-жазушылар және зиялы қауымның белді өкілдері қатысты.