"KitapTime-2023" ІІ жалпы республикалық кітап фестивалі өтті.

18 Қыркүйек 2023

 "KitapTime-2023" ІІ жалпы республикалық кітап фестивалі өтті. 

 

ҚР Мәдениет және ақпарат министрлігінің қолдауымен ҚР Ұлттық академиялық кітапханасында "KitapTime – 2023" ІІ жалпы республикалық кітап фестивалі өтті. Кітап оқуды кеңінен насихаттау, интеллектуалды жастарды ынталандыру, мәдени құндылықтарымызды халыққа жеткізу мақсатында өткен кітап мерекесі республиканың көпшілік кітапханаларының қолдауымен еліміздің әр өңірінде қатар тойланды. 

Фестивальдің ресми ашылуына дейін күндізгі уақытта «Руханият жолы» флэшмобы және келушілер үшін көрме-жәрмеңке ұйымдастырылды. Жәрмеңкеге «Эльдорадо», «Steppe&World», «Абай», «Пайдалы кітап», «Fox books», «Kitapal» кітаптар үйі, «Отбасы хрестоматиясы», «Мазмұндама», «Qasym», «Qyr balasy, «QAZBILIM» баспалары, «Сенімен Болашақ», «Marfu Press» баспа үйлері мен республикалық ата-аналар қоғамдық бірлестігі, шет ел елшіліктерінің кітаптары қойылды. Сонымен қатар, «Art-vision» қолөнер шеберлері мен суретшілердің павильоны, bookcrossing, «Photo zone», балалар шығармашылығына арналған алаңда ертегілер қойылымы, шеберлік сағаттары, интерактивті, ұлттық ойындар, балалар әдебиетінің кейіпкерлерінің шеруі жиналғандарға жағымды көңіл күй сыйлады.

Фестивальдің ашылуында ҚР Мәдениет және ақпарат министрлігінің Архив, құжаттама және кітап ісі комитетінің төрағасы Қуат Бораш, жазушы, драматург, ҚР Мемлекеттік сыйлықтың лауреаты Әлібек Асқар, ҚР Парламенті Сенатының депутаты, Қазақстанның Құрметті журналисі Нұртөре Жүсіп, ҚР Парламенті Мәжілісінің депутаты Жұлдыз Сүлейменова, өзге де зиялы қауым және қазақстандық елшіліктер арнайы құттықтау сөз сөйлеп, мазмұнды шараның маңыздылығына тоқталды.

Фестивальмен қатар дәл осы күні кітапханада жазушы, дарынды публицист Оралхан Бөкейдің  80 жылдық мерейтойына орай  «Шолпандай таң алдында туып батты» атты конференция өтті. Кітапхананың әрбір залында кітап таныстырылымдары, ақындар алаңы, мәдени, рухани кештер өтіп жатты.

Кешкілік фестивальге жиналғандар «Reader» - жұлдыздардың қатысуымен кітапханаға жазылу акциясына атсалысып, «Кітапханалық түн» мәдени шарасының куәсі болды.  «Кітапханалық түн» бағдарламасында бизнес-коучинг, «Musikal party» классикалық музыка кеші, «Quiz» интеллектуалдық алаңы, поэзия кеші, Астананың түнгі аспанын телескоппен тамашалау, түнгі караоке, АНТИКАФЕ «Book & Сoffee» сынды түрлі қызықты, жан-жақты шаралар ұйымдастырылды. Бір қуантарлығы, дәл осы күні 5000-ға жуық адам кітапханаға аяқ басып, кітап мерекесінің куәсі болды.  Қазақстанның әр аймақ, ауылында қатар өткен кітап фестивальдерінің де биылғы қарқынды жұмысы көңіл қуантады. Түркістан облысының өзінде бір мезетте 396 кітапхананың осы шараға атсалысуы руханиятқа жасалған үлкен қолдау.

 

"KitapTime-2023" ІІ жалпы республикалық кітап фестиваліне әрбір өңірден атсалысқан, рухани шараны қолдаған әрбір оқырманға, қонақтарға алғыс білдіреміз! 

 

ҚР Ұлттық академиялық кітапханасының ұжымы

Іс-шаралар күнтізбесі

24
Ақпан

12:00

«Toastmasters» клубы

М. Мақатаев залы

8-(7172)-47-26-75

24
Ақпан

12:00

«Алқа» әдеби-мәдени клубының отырысы Немат Келімбетов «Үміт үзгім келмейді»

Фариза Оңғарсынова залы

8-(7172)-47-26-75