ҚР Ұлттық академиялық кітапханасы Мәдениет және өнер қызметкерлерінің күніне орай ұйымдастырылған Мәдениет қызметкерлері форумы аясында 20 мамырда «Кітапханалық-ақпараттық салада ЖИ-технологияларын енгізу»  семинарын өткізді.

Семинарды Қазақстан Республикасының Ұлттық академиялық кітапханасы директорының орынбасары Нұржан Жолдыбалинов жүргізді.

Семинар спикерлерінің құрамында кітапхана ісі және цифрлық технологиялар саласындағы жетекші сарапшылар болды.

Шараның қонағы Ресей Ғылым академиясы Сібір бөлімшесінің Иркутск институты орталық ғылыми кітапханасының меңгерушісі Иван Трофимов «Жасанды интеллект дәуіріндегі кітапханалардың атқаратын қызметі: жаңа ЖИ технологияларын қолданудың мүмкіндіктеріне талдамалық шолу» тақырыбында қолжазбалар мен сирек кітаптарды қалпына келтіру және  сапасын жақсарту, суреттер мен фотоларды және дауысты өңдеу, жандандыру жолдары мен платформаларын көрсетті.

 «Солтүстік Қазақстан облыстық кітапханасының қызметіндегі жасанды интеллект» тақырыбында баяндама жасаған С.Мұқанов атындағы Солтүстік  Қазақстан облыстық кітапханасының директоры Бейбітгүл Абильмажинова өз тәжірибесімен және білімімен бөлісті. Атап айтар болсақ, индекстеу, тақырыптық айдарларын анықтау және басқа кітапханалық үдерістерді жасанды интеллектінің көмегімен жүзеге асыруды  және аталмыш кітапханадағы AI Zhan нейро-көмекшісінің таныстырылымын жасады.

Өскемен қаласы Орталықтандырылған кітапханалар жүйесі директорының орынбасары Айгүл Ахметжанова мен кітапханашы- бағдарламашы Шыңғыс Қайсарұлы «Сандық технологиялар және ЖИ оқырмандарды тарту үшін кітапханалық құралдар» тақырыбында әріптестерге Өскемен қаласындағы Оралхан Бөкей атындағы кітапхананың https://bokeylibrary.kz/  сайты және Bokey Mobile қосымшасы арқылы жасанды интеллектіні қолдану әдістері жайлы құнды ақпараттарға толы баяндама жасады. 

«MetaКітапханалар – цифрлық кеңістікке қадам» тақырыбында сөз алған Қазақстан Республикасы Ұлттық академиялық кітапханасы директорының орынбасары Нұржан Жолдыбалинов жасанды интеллект арқылы кітапхана қызметтері мен сервистерін қалай қызықты оңтайландыру жолдарын бөлісті.

Айтулы семинарға қатысқан 150 кітапханашы кәсіби шеберліктерін шыңдап қана қоймай, жан-жақты тәжірибе алмасты.