Кітапханада ақын, Қазақстан Жазушылар одағының мүшесі ГҮЛБАҚЫТ ҚАСЕННІҢ “БАҚЫТ ГҮЛІ” (“Mutluluk gülü”) кітабының таныстырылымы өтті.

Жыр жинағы қазақ және түрік тілінде Анталья қаласында жарық көрген.  2023 жылғы 15 желтоқсан күні Аланья қаласында тұсауы кесіліп, түрік елінің өлкелеріне таратылды. «Бақыт гүлі» кітабында ақынның 40-қа жуық өлеңдері түрік тіліне аударылған. Түрік тіліне аударған Түркияның аудармашысы, баспа саласының үздігі – Арслан Байрак. 

Кәсіби, көркем аударма жасалғандықтан өлеңдер түрік тілінде де нәзіктігін, өзіне тән бояуын жоғалтқан жоқ. Өлеңдердің тақырыбы  негізінен достық, сезім, махаббат жайлы.

Гүлбақыт Тоқтанқызы Қасен – 1975 жылы Талдықорған облысы, Панфилов ауданы, Айдарлы ауылында дүниеге келген.

Бүгінде Жетісу облысы әкімі аппаратында облыс әкімінің бас инспекторы болып жұмыс жасайды. 

«Алуа» (2014 ж.), «Бақыт гүлі» (2015 ж.), «Құсқанаты» (2017 ж.), «Жүрегімнің хаттары» (2020 ж.) жыр жинақтары, «Күнтұмар-Айтұмар» (2019 ж.) атты қырғыз тілінде, «Бақыт гүлі» (2023 ж.Аланья қаласында) түрік тілінде кітабы шықты. «Балалар кітапханасы» аясында «Күн дегенім-дәу жұлдыз» (2023 ж.) атты суретті кітабы мемлекеттік қолдаумен шыққан.

Өлеңдері қырғыз, әзербайжан, түрік, саха, орыс, қытай тілдеріне аударылған.

Шарада Астана Жастар театрының студенттері ақынның өлеңдерін оқып,көрініс қойды. Модератор ҚР Жазушылар Одағы Астана филиалының төрағасы, ақын Дәулеткерей Кәпұлы Жетісулық ақын – Гүлбақыт Қасенқызының шығармашылығын дәріптеп, сәттілік тіледі.

      Шараға зиялы қауым өкілдері, ақын-жазушылар, БАҚ өкілдері, оқырмандар қатысты.