«Ұлт және ұлттық кітап» атты апталық аясында қазіргі Қазақстан туралы үздік роман үшін жыл сайын берілетін,  Қазақстан азаматтарының, ел патриоттарының және кәсіпқой әдебиетшілер тобының тәуелсіз жобасы - mecenat.kz әдеби сыйлығына қатысты «Кітап – ұлттық құндылық» атты дөңгелек үстел өтті.

         Дөңгелек үстелде қазақ әдебиетінің қазіргі жағдайы, қоғамдағы рөлі, даму процестері туралы сөз қозғалып, мемлекеттің, демеушілердің қолдауымен өтіп жатқан әдеби байқаулар туралы  өзекті пікірлер айтылды. Сыйлықтың құрылтайшысы Ерлан Асқарбеков: «Біз барлық қатысушылардың шығармаларына  зор жауапкершілікпен қараймыз. Әдеби шығармалар  арқылы отандық әдебиеттің дамуына айтарлықтай үлес қосып жатқанымыз сөзсіз»,- деп  жоба идеясын таныстырды.

        Шара барысында сөз алған  Эстонияның Қазақстан Республикасындағы Төтенше және Өкілетті Елшісі Яап Ора, ақын, жазушы, драматург, жыршы, манасшы, Қазақстанның еңбек сіңірген қайраткері Баянғали Әлімжанов,  ф.ғ.д., Л.Гумилев атындағы ЕҰУ профессоры Асима Калимовна, белгілі драмматург, кино және театр актері, жазушы  Нартай Сауданбекұлы, белгілі сыншы Амангелді Кеңшілікұлы сынды қонақтар әдебиет саласының өзекті мәселесі тұрғысында сөз сөйлеп, «Mecenat.kz» әдеби сыйлығы туралы көзқарастарын ортаға салды.