Кітап ханамыздың «АЛҚА» клубы “Майда қоңыр” атты лекция өткізді.

17 Қаңтар 2023

Биыл сал-серілердің падишасы Ақан Сері Қорамсаұлының туғанына 180 жыл толып отыр. Осыған орай серінің өміріне, шығармашылығына байланысты  “Майда қоңыр” атты  лекция өтті. Лекцияны тарихшы, этнограф Саят Ыбырай мен дәстүрлі әнші, Қазақ ұлттық өнер университеті, Дәстүрлі ән кафедрасының аға оқытушысы Тельман Тілегенұлы жүргізді. Сал-серілік мәдениетті жалғаушы ретінде Ақан серінің шығармашылығы біз үшін өте маңызды.

Ақан сері (шын аты- Ақ жігіт) Қорамсаұлы 1843 жылы Көкшетау уезінің Шалқар болысында Үлкен Қоскөл жағасында, қазіргі Солтүстік Қазақстан облысы, Айыртау ауданы, Антоновка ауылдық округінде дүниеге келген. Ақжігіт алғашқыда ауыл молдасынан білім алады. 16-17 жасында өнер жолына түседі. Тарихтың алтын парағына анасы еркелетіп қойған Ақан есімі қалады.

Сал-серілік дәстүрді барша сән-салтанатымен ұстанған Ақан сері жүйрік ат, қыран бүркіт, құмай тазыны жан серігі еткен. Мұндай өмір-салт оның әншілік-ақындық шабытына тұғыр болып, «Құлагер», «Маңмаңгер», «Көкжендет», «Екі торы ат», «Алайкөк», «Тер қатқан» сияқты тамаша әндердің дүниеге келуіне себепші болған. Лекция барысында осы әндердің тарихымен қатар әні шырқалды. Сондай-ақ, оның «Көкшетау», «Сырымбет», «Кербез сұлу» деп аталатын әндері туған жерге, өскен елге деген перзенттік махабаттың жарқын айғағы деп айта аламыз.

Ақан сері өз кезінде Біржан сал, Үкілі Ыбырай, Балуан Шолақ, Жаяу Мұса, Естай, Иманжүсіп, Құлтума сияқты ақын-әншілермен бастас болып, халықтың мәдени-рухани өміріне айырықша ықпал еткен. Ақан Серінің ұлт жолындағы еңбегі халық жадында. Тарих тұлғаларын танытады.

 

Іс-шаралар күнтізбесі

Жуырда
жаңа оқиғалар пайда болады