ҚР Ұлттық академиялық кітапханасында 2025 жылдың 5 наурыз күні танымал театр және кино режиссері, кинодраматург, Қазақстанның Халық әртісі Талғат Теменовтің «Ай астындағы әңгіме» атты кітабының таныстырылымы өтті.

Жинаққа автордың соңғы жылдары жазылған эсселері мен очерктері, сұхбаттары мен сценарийлері топтастырылған.

Шараны ақын, Қазақстан Жазушылар одағы Астана қалалық филиалының төрағасы Бауыржан Бабажанұлы жүргізді.

Кітаптың тұсаукесерінде сөз алған Мемлекет қайраткері Әлихан Бәйменов, ақын, Халықаралық «Алаш» әдеби сыйлығының лауреаты Ғалым Жайлыбай, мемлекет және қоғам қайраткері Дархан Қыдырәлі, ҚР еңбек сіңірген қайраткері режиссер Сәулебек Асылхан  Талғат Теменовтің әдебиет пен өнердегі, қазақ руханиятындағы ерекше болмысына тоқталды.

Халықаралық кеңістікте фильмдер түсірген кинорежиссер елге жазушылық қырымен де жақсы таныс.  Оның  «Махаббат бекеті», «Қара қыз», «Өлімнен кейінгі  жаза», «Қызғыш құс», «Көшпенділер», «Судағы із», «Менің күнаҺар періштем» т.с.с  фильмдері көрерменнен лайықты бағасын алып, бірнеше рет халықаралық кинофестивальдарда жүлделі болған.

Ғ.Мүсірепов атындағы Қазақ мемлекеттік академиялық балалар және жасөспірімдер театрында,  Қ.Қуанышбаев атындағы қазақ ұлттық музыкалық драма театрында Т.Теменовтің көптеген спектакльдері сахналанды.

Бұған дейін автордың «Гүлназ», «Ой- Жасын», «Айғағым болшы, ақ сәуле», «Таң нұры», «Беймәлім таныс бейнелер» атты кітаптары жарық көрген.

Шараға белгілі Мемлекет және қоғам қайраткерлері, өнер, театр  және кино саласының майталмандары, зиялы қауым өкілдері, журналистер, оқырмандар қатысты.