ҚР Ұлттық академиялық кітапханасы мен Астана қаласы әкімдігінің «Әдістемелік орталығы» бірлесе отырып,  алдағы Әкелер күніне орай «Әкемен оқыған бір кітап» атты READx форматында әдеби-танымдық шара өткізді.

         Қазақстанда Ақпарат және қоғамдық даму министрлігінің бастамасымен 2023 жылдан бастап маусым айының үшінші жексенбісі «Әкелер күні» мерекесі болып аталып өтеді. Бұл мереке – қоғамда әке беделін көтеру, оның бала тәрбиесіндегі маңызын арттыру, сондай-ақ отбасылық құндылықтарды кеңінен дәріптеу мақсатында енгізілген.

         Шарада сөз алған  ҚР Ұлттық академиялық кітапханасының басшысы Күміс Сейітова атаулы күннің маңызына тоқталып, ұрпаққа үлгі боларлық әке тұлғасын насихаттаудағы жұмысқа сәттілік тіледі.

«Әкемен оқыған бір кітап» шара аясында оқырмандар сүйікті шығармаларымен бөлісіп, әкелерімен бірге оқыған немесе бірге талқылаған кітаптар туралы баяндады. READx форматы арқылы қатысушылар көркем туындыдан алған әсерлерімен бөлісіп,  тәрбиелік мәні бар ой-толғамдарын ортаға салды.

Сондай-ақ, шарада танымал балалар жазушыларының қатысуымен еркін форматтағы сұхбаттар, кітапқа байланысты мазмұнды пікірталастар, шығармашылық бағыттағы тапсырмалар, сұрақ-жауап кезеңдері ұйымдастырылды.

Шараға балалар жазушылары, педагогтар, ата-аналар, кітапханашылар, мектеп оқушылары мен кітапхана оқырмандары қатысты.