Биыл үшінші рет  ұйымдастырылып отырған байқауға еліміздің барлық аумағынан 2000-ға жуық үміткер қатысқан.

 Кітапханада өткен Республикалық қорытынды байқауға 17 облыстан және Астана мен Алматы қалаларынан 18 кітапхана атсалысты.

 «Шәкәрім оқулары» байқауының алғашқы облысаралық кезеңінде топ жарып,  үздік деп танылған 18 оқушы Елордада өзара бақ сынасты.  Жеңімпаздарды «Шәкәрім оқулары» республикалық байқауының демеушісі, кәсіпкер, «Адал ас» корпорациясының президенті Ермек Асылғазинұлы Мезібаев бастаған тәуелсіз сарапшы-әдебиеттанушы қазылар алқасы анықтады.

Байқау қорытындысы бойынша жүзден жүйрік шыққан Батыс Қазақстан облысы, Орал қаласынан келген 8 сынып оқушысы Есболсын Нұрайым Азаматқызы бас жүлдеге ие болды.  І орынды Маңғыстау облысы, Түпқараған ауданының 5 сынып оқушысы  Әбілқайырқызы Муслима иеленді. ІІ орын Қызылорда облысы, Жаңақорған ауданының 5 сынып оқушысы Оразбек Бақдәулет Мақсатұлына бұйырды. Ал астаналық 7 сынып оқушысы Муратбек Нұрқайыр жүлделі ІІІ орынға лайық деп танылды.  Жеңімпаздарға демеушілер есебінен бағалы сыйлықтар берілсе, жетекшілері арнайы алғыс хаттармен марапатталды.

Қалған қатысушыларға Алғыс хаттар табыс етілді. Кітапхананың серіктесі «Фолиант» баспасы байқауға қолдау білдіріп, байқау қатысушыларына кітаптар сыйға тартты.

Шараның мақсаты – қазақ халқының әдеби мұрасын дәріптеу, Шәкәрім шығармаларындағы эстетикалық талғам мен тұлғалық қасиеттерді, адами құндылықтарды насихаттау, ұлттың рухани мұрасына деген сүйіспеншілікке тәрбиелеу.