14 қараша күні Қазақстан Республикасының Ұлттық академиялық кітапханасында «Бір ел – бір кітап» республикалық акциясы аясында қазақтың көрнекті жазушысы, ақын, әдебиет сыншысы Тәкен Әлімқұловтың «Қараой» тарихи әңгімесін талдау сағаты өтті.

Іс-шараның мақсаты – қазақ әдебиетінің бай мұрасын дәріптеу, ұлт руханиятына өлшеусіз үлес қосқан қаламгердің өмірі мен шығармашылығын насихаттау, сондай-ақ оқырмандардың әдеби талғамын арттыру.

Ұлттық әдебиетті кеңінен насихаттауға бағытталған «Бір ел – бір кітап» акциясы аясында жазушының өмірі мен шығармашылық мұрасы туралы тың мәліметтер ұсынылып, қатысушылар «Қараой» повесіндегі тарихи тұлға – Махамбет Өтемісұлының бейнесін талқылады. Тарихи хикаятта ерлік пен еркіндіктің символына айналған Махамбет Өтемісұлының соңғы күндері, оның қайсар рухы мен ел тәуелсіздігі жолындағы күресі көркем тілмен суреттеледі.

Шараға кітапхананың тұрақты оқырмандары, мектеп оқушылары мен ұстаздар қатысып, шығарманы жан-жақты талдады.