ҚР Ұлттық академиялық кітапханасында қазақ ғылымының атасы атанған Қаныш Имантайұлы Сәтбаевтың толық шығармаларынан құралған 10 томдық жинағының тұсаукесері өтті.

Жинақ Қазақстан Республикасы Ғылым және жоғары білім министрлігінің қолдауымен, Қ.И. Сәтбаев атындағы Қазақ ұлттық техникалық зерттеу университетінің басқаруымен және «Халықаралық Сәтбаев қорының» атсалысуымен жарық көрді.

Шарада Сенат төрағасы Мәулен Сағатханұлы Әшімбаевтің, Қазақстан Парламенті Мәжілісінің төрағасы Ерлан Жақанұлы Қошановтың, ҚР Премьер-Министрі Олжас Абайұлы Бектеновтің құттықтау хаттары оқылды.

Модератор  ҚР Парламенті Сенатының депутаты, «Халықаралық Сәтбаев қорының» қамқоршылар кеңесінің төрағасы Алтынбек Нухұлыжинаққа ғалымның 1923–1963 жылдар аралығындағы монографиялары, мақалалары, баяндамалары, геологиялық барлау есептері мен ғылыми-техникалық жобалары, руханият саласындағы еңбектері енгенін,  Сәтбаевтың ғылыми мол мұрасының тереңдігі мен отандық ғылымның іргетасын қалаудағы тарихи рөлі туралы айтып өтті.

ҚР Ғылым және жоғары білім министрі Саясат Нұрбек : «10 томдық жинақ – еліміздің мәдени, ғылыми және рухани өміріндегі маңызды оқиға. Бұл жинақ Қаныш Сәтбаевтың ғылыми және азаматтық мұрасын ұлықтап, болашақ ұрпаққа отандық ғылым тарихының алтын қазынасын жеткізуді мақсат етеді»- дей келе Қаныш Сәтбаевтің 125 жылдығы аясында 500 – ден астам шаралар  атқарылғандығына  тоқтала кетті.

Шара барысында 10 томдық жинақ «Атамұра» баспасынан 10000 дана таралыммен жарыққа шығып, еліміздің ғылыми мекемелеріне, жоғары оқу орындарына және кітапханаларына үлестірілгендігі жөнінде,  сонымен қатар, жинақтың цифрлық нұсқасы электронды кітапханалар мен ашық ғылыми платформаларда қолжетімді екендігі де баса айтылды.

Шараға ҚР Үкіметінің мүшелері, ҚР Парламентінің Сенат және Мәжіліс депутаттары, ҚР Президенті жанындағы Ұлттық Ғылым академиясы басшылығы мен Ұлттық ғылыми кеңестің мүшелері, мемлекет және қоғам қайраткерлері қатысты.