Қазақстан Республикасының Ұлттық академиялық кітапханасында «Отбасымен оқимыз» клубы аясында белгілі қаламгер, тележурналист Азамат Әбілқайырмен кездесу өтті. Кездесу аясында «Ренжіскен кітап пен адамды смартфон қалай татуластырды?» атты шығармасы талданды.

         Азамат Әбілқайыр – қазіргі қазақ әдебиеті мен тележурналистика саласында танымал қаламгер. Ол поэзия мен публицистикада өзіндік үнімен ерекшеленіп, қазақ руханиятына үлес қосып келеді. Шара барысында «Ренжіскен кітап пен адамды смартфон қалай татуластырды?» атты шығармасы талқыланып, қазіргі замандағы кітап пен технология арасындағы қарым-қатынас туралы пікір  алмасты.

         Балалар мен жасөспірімдердің кітап оқуға деген қызығушылығын арттыру, қазіргі технологиялар мен дәстүрлі кітап оқудың үйлесімділігін көрсету, жас ұрпақтың әдебиетке деген сүйіспеншілігін оятуды көздейтін шарада жас оқырмандар мен қатысушылар автордың шығармашылық жолы мен журналистика саласындағы тәжірибесі туралы сұхбаттасып, қызықты деректермен қанықты.