![](/sites/default/files/styles/news_medium/public/2023-04/IMG_5966%20%281%29.jpg?itok=vfWCRFdZ)
«Eurasian Book Fair-2023» Еуразиялық халықаралық кітап көрме-жәрмеңкесі басталды
20 Сәуір 2023
Бүгін кітапсүйер қауым үшін үлкен мереке. Елордада «Eurasian Book Fair-2023» Еуразиялық халықаралық кітап көрме-жәрмеңкесі басталды. Көрме алтыншы рет өтіп отыр. Бес күнге созылатын шараның негізгі мақсаты – ТМД, Еуропа, Азия елдерінің баспа ісі мен кітап саудасын бір алаңға біріктіру, оқырман мен қаламгер арасында байланыс орнату.
Шара аясында ҚР Ұлттық академиялық кітапханасы жаңа кітаптардың тұсаукесері мен таныстырылымы, ақын-жазушылармен кездесу өткізуді бастап кетті.
Кітапхана басшысы Ғазиза Құдайбергенқызы “Мазмұндама” қорының төрағасы Шыңғыс Мұқанмен “Баспа ісі, аударма, авторлық құқық” тақырыбында әңгіме өрбітті.
Талантты жазушы, драматург Роза Мұқанованың “Сарра” кітабының тұсауы да дәл осы шарада кесілді.
Сонымен қатар, “Абай баспасынан” жарық көрген кітаптардың таныстырылымы болды. Ақын Ақберен Елгезекпен “Автограф-сессия” өтсе, ақын, журналист, проза жанрында да қалам тербеп жүрген қаламгер Ұларбек Нұрғалымұлы өз оқырмандарымен кездесті.
Бұл – Ұлттық кітапхананың алғашқы күні өткізген шаралары. Алдағы күндері де сүйікті ақын-жазушыларыңызбен кездесіп, көкейіңізде жүрген сұрақтарыңызды қоюға үлкен мүмкіндік туып тұр.
Оқырман мен қаламгер арасына алтын көпір болатын осындай шаралар жылына бір рет емес, екі-үш рет өтсе де артық етпейтін еді.