ҚР Ұлттық академиялық кітапханасында 13 қараша күні  көрнекті композитор, әндер мен романстардың авторы Әбілахат  Еспаевтың туғанына 100 жыл толуына арналған «Ә.Еспаев — ән жанрының шеңберін кеңейткен композитор» атты  музыкалық кеш өтті.

Қазақ музыка өнерінің көрнекті өкілі, сазгер Әбілхат Еспаевтың шығармашылығына арналған «Ән әлемінің Әбілахаты» атты ақпараттық көрме ұйымдастырылды. 

Көрмеге композитордың өмірі мен өнер жолынан сыр шертетін жиырмаға жуық басылым, ноталар жинағы, кітаптар мен мерзімді басылым беттерінде жарық көрген мақалалар, сондай-ақ автордың әндері жазылған күйтабағы қойылды. 

Әбілахат Еспаев қазақ музыкасының әртүрлі жанрларында  250 –ге  жуық туынды жазды, олардың арасында Туған ел (1942) – оның алғашқы әні, сондай-ақ «Маржан қыз», «Жастар мерекесі», «Шофер келді қырманға», «Ұстазым менің, ұстазым» сияқты әндері ерекше танымал. Соңғы әні ұстаздарға арналған «Ұстазым менің, ұстазым» әні мұғалімдер қауымының әнұранына айналды, бұл туындысы 1960 жылы Алматыда өткен мұғалімдер құрылтайында жазылған.

Шараға Композитор А. Еспаевтың қыздары   Гүлмира Әбілахатқызы мен Гүлсім Әбілахатқызы онлайн қатысты. Композитор, Қазақстанның Еңбек сіңірген қайраткері, «Құрмет» орденінің иегері Жоламан Тұрсынбаев сазгердің адами келбеті мен биік өнері жайлы жылы естелігімен, әсерлі әңгімесімен бөлісті. Ал К.Байсейітова атындағы Қазақ Ұлттық өнер университетініңаға оқытушысы, өнертану ғылымдарының магистрі Диля Дуиесинова композитордың танымал әндеріне жан-жақты талдау жасады.

Сондай-ақ, композитор, ҚХР еңбек сіңірген әртісі Даму Оралғазыұлы, актер, Қазақстанның еңбек сіңірген қайраткері Сырым Қашқабаев сынды қонақтар Ес¬паевтың ойға оралымды, жүрекке жылы, ұлттық нақышқа бай әндерінің маңызына тоқталды.

Рухани шараға зиялы қауым өкілдері, БАҚ өкілдері, кітапхана оқырмандары, студенттер мен оқушылар қатысты. Шарада сазгердің танымал әндері орындалды. Іс шара гибридті форматта (офлайн-онлайн) өтті.